भूमिगत गटारी होणार : विकास आराखड्यानुसार कामे मार्गी
नीरा नरसिंहपूर – नीरा नरसिंहपूर (ता. इंदापूर) येथील लक्ष्मी नरसिंह देवसंस्थानच्या विकासकामासाठी मिळालेल्या निधीतून कामे मार्गी लागत आहेत. कामाचा दर्जा मजबूत व टिकाऊ असल्याने गावकऱ्यांनी समाधान व्यक्त केले आहे. उर्वरित कामे पाच ते सहा महिन्यांत पूर्ण होणार आहे.
लक्ष्मी नरसिंह देवस्थान हे मुख्यमंत्री देवेंद्र फडणवीस यांचे कुलदैवत आहे. महाराष्ट्राच्या कानाकोपऱ्यातील भाविक या ठिकाणी दर्शनासाठी येतात. मंदिर व मंदिरासभोवती कामे प्रगतीपथावर असून गावातील भूमिगत गटारीचे काम सुरू आहे. शेजारील भीमा नदी व नीरा नदीवरील पुलाचे काम व भक्तनिवासाचे कामात गती आहे. आमदार दत्तात्रय भरणे यांनी विकासकामांसाठी पाठपुरावा केला आहे. मुख्यमंत्री देवेंद्र फडणवीस यांनी विकास आराखड्यासाठी निधी देऊन परिसराचा कायापालट केला आहे. भक्त निवास व हेलिपॅडही बांधले आहे.