पुणे : उत्तर प्रदेशमधील प्रयागराज याठिकाणी कुंभमेळा होणार असून त्यासाठी मध्यरेल्वेच्या पुणे रेल्वे विभागाकडून पुणे ते मऊ जंक्शन दरम्यान अतिरिक्त विशेष गाड्या चालविण्याचा निर्णय घेण्यात आला आहे. त्यामध्ये दि. ८ जानेवारी ते २१ फेब्रुवारीदरम्यान एकूण १२ फेऱ्या होणार आहे.
पुणे-मऊ जंक्शन कुंभमेळा (ट्रेन क्र.०१४५५) विशेष गाडी पुण्याहून सकाळी १० वाजून १० मिनिटांनी निघेल आणि दुसऱ्या दिवशी रात्री ११ वाजता पोहोचणार आहे. दि. ८ जानेवारी, १६ जानेवारी, २४ जानेवारी २०२५, तर दि. ६ आणि ८ फेब्रुवारी आणि २१ फेब्रुवारी २०२५ या दिवशी ही गाडी धावणार आहे.
मऊ-पुणे कुंभमेळा (ट्रेन क्र.०१४५६) विशेष गाडी मऊ येथून रात्री ११ वाजून ५० मिनिटांनी सुटेल आणि तिसऱ्या दिवशी दुपारी ३ वाजून ४५ मिनिटांनी पुण्यात पोहोचेल. ही गाडी दि. ९ जानेवारी, १७ जानेवारी, २५ जानेवारी, ७ फेब्रुवारी आणि ९ फेब्रुवारी २०२५ रोजी धावणार आहे. या गाडीला दौंड कॉर्ड लाइन, अहमदनगर, बेलापूर, मनमाड, जळगाव, भुसावळ, खंडवा, तलवडिया, छनेरा, खिरकीया, हरदा, बानापुरा, इटारसी, पिपरिया, नरसिंगपूर, जबलपूर, कटनी, मैहर, सतना, माणिकपूर, प्रयागराज छियोकी, चुनार, वाराणसी, शहागंज आणि आझमगड आदी स्थानकावर थांबे देण्यात आले आहेत.
