पुणे : शहरातील स्पा सेंटर्स सध्या पोलिसांच्या रडारवर आहेत. ज्या- ज्या ठिकाणी मसाजच्या नावाखाली वेश्या व्यवसाय चालविला जात असल्याचा संशय असेल, तेथे पोलिसांकडून धडक कारवाई सुरू असल्याचे मागील काही दिवसांतील कारवाईवरून दिसून येत आहे. बुधवारी बाणेर येथील कारवाईनंतर विश्रांतवाडी येथेही स्पा सेंटरवर छापा टाकण्यात आला आहे. गुन्हे शाखेने बेशिस्त, बेकायदा आणि नियमबाह्य मसाज सेंटरची माहिती संकलित करून कारवाईची मोहीम हाती घेतली आहे.
विश्रांतवाडी येथे महिलांना पैशांचे आमिष दाखवून स्पा सेंटरच्या नावाखाली सुरू असलेल्या वेश्या व्यवसायाचा गुन्हे शाखेच्या भरोसा सेलने पर्दापाश केला आहे. याप्रकरणी आरोपीला बेड्या ठोकण्यात आल्या असून, दोन पीडित महिलांची सुटका केली आहे. स्पा मॅनेजरसह मालक सूरज भरत शाहू (रा. वाशी, ठाणे) याला अटक केली आहे. विश्रांतवाडीतील धानोरी जकात नाका परिसरात असलेल्या गुडविल स्क्वेअर मॉलच्या दुसर्या मजल्यावर स्पा सेंटरच्या नावाखाली वेश्या व्यवसाय सुरू असल्याची माहिती गुन्हे शाखेच्या भरोसा सेलला मिळाली.
त्यानुसार पथकाने त्याठिकाणी बनावट ग्राहक पाठवून खात्री केली. त्यानंतर छापा टाकून दोन पीडित महिलांची सुटका केली. याप्रकरणी मॅनेजर व मालक असलेल्या शाहूला अटक केली आहे. अपर आयुक्त शैलेश बलकवडे, उपायुक्त निखिल पिंगळे, एसीपी गणेश इंगळे, पोलीस निरीक्षक संगीता जाधव यांच्या पथकाने ही कारवाई केली.
