SeeShiv Munde Post : मंत्री धनंजय मुंडे यांना घरगुती हिंसाचार प्रकरणात वांद्रे कौटुंबिक न्यायालयाकडून दोषी ठरवण्यात आले आहे. धनंजय मुंडे यांच्या पत्नी करूणा शर्मा यांनी केलेले आरोप कोर्टाने मान्य केले असून करूणा मुंडे यांना दरमहा 2 लाखांची पोटगी देण्याचे आदेश कोर्टाने जारी केले आहेत. त्यातील 1 लाख 25 हजार उदरनिर्वाहासाठी आहेत. तर 75 हजार मुलीचं लग्न होईपर्यंत तिच्या देखभालीसाठी आहेत. मुलगा सज्ञान असल्याने त्याला कोणतेही पैसे मिळणार नाहीत. त्यामुळे पुन्हा एकदा धनंजय मुंडे आणि करुणा शर्मा चर्चेत आले आहेत.
कोर्टाने आदेश दिल्यानंतर करुणा शर्मा यांनी पत्रकार परिषद घेत धनंजय मुंडे यांच्यावर पुन्हा एकदा गंभीर आरोप केले आहेत. मात्र यादरम्यान सुरु झालेल्या चर्चेवर करुणा शर्मा यांचा मुलगा सिशिव मुंडे याने इंस्टाग्रामला एक पोस्ट शेअर करत प्रतिक्रिया दिली आहे. एकिकडे न्यायालयाने करुणा शर्माच्या बाजूने निर्णय दिलेला असताना सिशिव मुंडे याने वडिलांची बाजू घेत आईकडूनच सर्वांना त्रास होत होता असा खुलासा केला आहे.
सिशिव धनंजय मुंडे याची पोस्ट चर्चेत?
मी सिशिव धनंजय मुंडे, मला आता बोलणे भाग आहे कारण माध्यमांनी आमच्या कुटुंबाला मनोरंजनाचा विषय बनवून टाकले आहे. माझे वडिल जगातले सर्वोत्कृष्ट वडिल नसले तरी ते आम्हा भावंडांना कधीही धोकादायक नव्हते. माझी आई कायम तिच्या अनेक विविध कारणांमुळे बाधित असायची आणि त्याचा वचपा ती आम्हाला वेदना देऊन काढायची. माझ्या आईला अनेक traumas आहेत. त्याचा वचपा ती आम्हाला वेदना देऊन काढायची. तिने घरगुती हिंसाचार झाल्याचे आरोप केले आहेत. मात्र खरं तर तिच्याकडून माझ्यासोबत व वडिलांवर घरगुती हिंसाचार व्हायचा.
पुढे बोलताना सिशिव धनंजय मुंडे म्हणाला, माझ्या वडिलांना तिच्याकडून होणारा शारीरिक व मानसिक जाच असह्य झाल्यानंतर ते तिला सोडून गेल्यावर तिने मला व माझ्या बहिणीला सुद्धा घर सोडून जायला सांगितले. कारण तिच्या मते तिचा व आमचा ( जन्मदाती आई असूनही) काहीही संबंध राहिला नव्हता. 2020 या वर्षापासून आमचे वडीलच आमची सर्वस्वी काळजी घेत आहेत. माझ्या आईला कोणत्याही आर्थिक विवंचना नाहीत तरीसुद्धा तिने घराचे कर्जाचे हप्ते भरायचे नाही असे जाणीवपूर्वक ठरवले आणि माझ्या वडिलांचा बदला घेण्यासाठी कायम खोट्यानाट्या गोष्टी पसरवत असते.
