पुणे – खासगी पॅथॉलॉजी लॅबमध्ये केलेल्या करोना संदर्भातील स्वॅब टेस्टिंगमधीलच बाधितांची संख्या कशी काय जास्त दिसते, असा प्रश्न महापालिकेच्या आरोग्य विभागाला पडला आहे. यामागे नेमके काय आहे, यासंदर्भातील शोध विभागाने सुरू केला आहे. त्यासाठी गुरूवारी या लॅबचालकांची बैठकही घेण्यात आली. याला सरकारी तपासणी संस्थांचे तज्ज्ञही उपस्थित होते.
सुरूवातीला “एनआयव्ही’मध्येच सगळ्या करोनाच्या टेस्ट केल्या जात होत्या, परंतु बाधितांची वाढती संख्या आणि “एनआयव्ही’वर पडणारा ताण, सॅंपल तपासणीसाठीचे अपुरे मनुष्यबळ या सगळ्याचा विचार करता खासगी पॅथॉलॉजी लॅबना टेस्टिंगला परवानगी देण्यात आली. तसेच त्यांचे दर ठरवून देण्यात आले. सुरूवातीला जास्त असणारे दर नंतर सर्वसामान्यांना परवडतील असे ठरवले गेले. त्यामुळे खासगी रुग्णालयात स्वॅब टेस्टिंगला जाणाऱ्यांचे प्रमाणही वाढले आहे. केवळ लक्षणे असणारेच नव्हे तर कोणाला गावाला, परदेशात जायचे असेल तर तेथे “करोना टेस्ट’ केल्याची कागदपत्रे लागतात म्हणूनही करणाऱ्यांची संख्या जास्त आहे.
सध्या 22-23 खासगी लॅब आहेत; एकूण 11 हजार स्वॅबटेस्ट घेतल्या असतील तर त्यातील नऊ हजार स्वॅब केवळ खासगी लॅबमध्ये घेतले जातात आणि त्याची चाचणी केली जाते. महापालिकेच्या स्वॅब कलेक्शन सेंटरमध्ये केवळ दोन अडीच हजार स्वॅब कलेक्शन केले जाते. टेस्टिंग खासगीमध्ये जरी जास्त होत असले तरी त्यांच्या तपासणीत बाधितांची संख्याही जास्त येत आहे, असे दिसून आले आहे.
एकूण बाधितांमध्ये खासगी लॅबमध्ये टेस्ट केलेल्या बाधितांची संख्या जास्त आहे. एवढी बाधितांमधील वाढ कशी झाली, लॅबचालकांची “टेस्टिंग मेथड’ बरोबर आहे ना, त्यांच्याकडून वापरले जाणाऱ्या किटमध्ये काही प्रॉब्लेम नाहीत ना किंवा त्यांच्याकडून “आयसीएमआर’च्या तपासणी नियमांचे पालन केले जाते ना, या सगळ्यांची माहिती या बैठकीत घेण्यात आली. या बैठकीला सरकारी लॅब आणि “आयसर’ संस्थेतील तज्ज्ञही उपस्थित होते. आम्ही नियमाप्रमाणेच तपासणी करतो, असा दावा खासगी लॅबचालकांनी यामध्ये केला आहे.
खासगी लॅबचालक “आयसीएमआर’च्या नियमांप्रमाणेच करोनाची टेस्ट करतात का, याची तपासणी केली जाणार आहेच; परंतु “क्रॉसचेक’ करण्यासाठी काही “रॅंडम सॅम्पलिंग’ ही करणार आहे. त्यातून बाधितांच्या वाढत्या संख्येचे गमक लक्षात येईल.
– डॉ. संजीव वावरे, सहायक आरोग्य प्रमुख, मनपा