विद्यार्थ्यांचे भवितव्य टांगणीला : शिक्षक, पालकही चिंतेत
पिंपरी – मुलांचे भविष्य उज्ज्वल करणाऱ्या शिक्षण क्षेत्राला करोनाचा चांगलाच फटका बसला आहे. करोनामुळे शाळा, क्लास ठप्प आहेत. शाळा सुरू होण्यासाठी जानेवारी महिना उजाडण्याची शक्यता आहे. त्यामुळे पालक, शिक्षक, संस्थाचालक तसेच विद्यार्थीही चिंतेत आहेत. मुलेही घरात बसून कंटाळली आहेत.
ऑनलाइन क्लासमुळे मुले मोबाइलच्या आहारी जाण्याबरोबरच त्यांच्या आरोग्यावरही परिणाम होण्याची शक्यता आहे. करोनामुळे मार्च महिन्यात शाळा बंद झाल्या. तिसरी घटक चाचणी व वार्षिक परीक्षा यामुळे होऊ शकल्या नाहीत. केवळ दोन परीक्षांवर मुलांचा निकाल देण्यात आला आहे. गेल्या चार महिन्यापासून मुले घरात आहेत. शाळा सुरू होण्यास नवीन वर्षाचा जानेवारी महिना उजाडण्याची शक्यता वर्तवली जात आहे.
मुलांना मोबाइलचे व्यसन
मुलांना मोबाइलचे व्यसन जडल्यासारखे झाले आहे. दिवसातील सर्वाधिक काळ मोबाइलवर जात असल्याने स्क्रीनच्या प्रखर लाईट व कानाचे विकार होत आहेत. तसेच मोबाइलच्या अतिवापराने अनेकांना डोकेदुखीचा त्रास वाढला आहे. मुले इंटरनेटच्या आहारी जाण्याची शक्यता वाढली आहे. त्यामुळे मुलांत नेत्रविकार, कर्णविकार, डोकेदुखी असे आजार वाढले आहेत. मुलांचे शैक्षणिक नुकसानासोबतच शारीरिकही नुकसान होत आहे. मुले खेळण्यासाठी बाहेर जात नाहीत. यामुळे मुलांचा शारीरिक व्यायाम पूर्णपणे थांबला आहे. दिवसभर घरातच टिव्ही पाहत असल्याने पालकांची चिंता वाढली आहे.
आरोग्य महत्त्वाचे की शिक्षण
शाळा सुरू झाल्या तरी चालविणे अवघड असणार आहे. सोशल डिस्टन्सिंगचे पालन करत शाळा सुरू ठेवाव्या लागणार आहेत. एका वर्गामध्ये 50 मुले असल्याने ही गोष्ट अशक्य आहे. दोन सत्रांत शाळा सुरू कराव्या लागतील. शिक्षकांना पूर्णवेळ वर्गातच थांबावे लागेल. यातूनही एखाद्या मुलाला करोनाचा ससंर्ग झाला तर शाळा बंद करावी लागेल. शहरातील बहुतांश नागरिकांची मुले शाळेत शिक्षण घेत आहेत. मुलांना करोनाची लागण झाल्यावर महामारी आटोक्यात आणणे कठीण होईल.
शाळा सुरु झाल्यानंतर शाळांमध्ये खेळ, स्नेहसंमेलन, सहली यावर निर्बंध येणार आहेत. तसेच दैनंदिन आरोग्य तपासणी करणे, सोशल डिस्टिन्सिंगचे पालन या जबाबदाऱ्या शाळांवर असणार आहेत.
ऑनलाइन शिक्षण पर्याय नव्हे
त्यामुळे शाळा व खासगी क्लास चालकांनी विविध ऍपद्वारे व मोबाइलवरून ऑनलाइन शिकवणी सुरू केली आहे. ठराविक वेळेत सर्व मुलांना स्मार्ट फोन देऊन व्हिडीओ कॉलिंग अथवा व्हॉटसऍपद्वारे नोट्स पाठविल्या जातात. परंतु शाळेतील शिक्षण आणि ऑनलाइन शिक्षणामध्ये बरीच तफावत आहे. ऑनलाइन शिक्षण हा दीर्घकाळासाठी पर्याय ठरु शकत नाही, असे तज्ज्ञांचे मत आहे. क्लास व अभ्यासाच्या नावावर पालकांचे मोबाइल दिवसभर मुले वापरत आहेत.
सरकारने शैक्षणिक संस्थांकडे गांभिर्याने बघितले पाहिजे. एकाच तराजूमध्ये सगळ्यांना समान तोलण्याची आवश्यकता आहे. विद्यार्थ्यांचे नुकसान तर झालेच आहे. त्यासोबतच शैक्षणिक संस्थांनाही मोठा फटका बसला आहे.
– प्रकाश खंदारे, संस्थाचालक पूना पब्लिक स्कूल.