-->

धक्कादायक! …म्हणून भावाच्या मदतीने पत्नीनेच केली पतीची हत्या

नगर (प्रतिनिधी) – पती-पत्नीच्या वादातून पत्नीने भावाच्या मदतीने पतीची हत्या केल्याची घटना नगर तालुक्यातील वाळुंज फाटा येथील मोरे वस्तीवर शनिवारी रात्री एक वाजता घडली. संतोष दत्तु मोरे (वय 42 रा. वाळुंज ता. नगर) असे हत्या झालेल्या इसमाचे नाव आहे.

याप्रकरणी मयत संतोष यांची पत्नी प्रियंका ऊर्फ शारदा संतोष मोरे (रा. मोरे वस्ती वाळुंज ता. नगर) व मेव्हणा रामेश्‍वर विठ्ठल दशवंत (रा. ताहराबाद ता. राहुरी) यांच्याविरूद्ध नगर तालुका पोलीस ठाण्यात खूनाचा गुन्हा दाखल करण्यात आला आहे. संदीप सोपान मोरे (वय-39 रा. वाळुंज ता. नगर) यांनी फिर्याद दिली आहे. पोलीस उपनिरीक्षक डी. आर. जारवाल यांच्या पथकाने आरोपींना अटक केली आहे.

संतोष मोरे हा पत्नी प्रियंकाला घरगुती कारणावरून नेहमी त्रास देत होता. यामुळे त्यांच्यात कायमच वाद होत होते. शनिवारी रात्री प्रियंकाने आपला भाऊ रामेश्‍वर दशवंत याला घरी मोरे वस्ती येथे बोलवून घेतले. संतोष व रामेश्‍वर यांच्यात शनिवारी रात्री वाद झाले. रामेश्‍वर व प्रियंका यांनी संतोष यांना लाथाबुक्क्यांनी मारहाण केली. रामेश्‍वर याने संतोष यांच्या डोक्यात लोखंडी कुर्‍हाडीचा तुब्याकडील बाजू मारून जखमी केले.

संतोष यांच्या डोक्याला मार लागल्याने त्याचा मृत्यू झाला. घटनेची माहिती तालुका पोलिसांना मिळताच नगर ग्रामीणचे पोलीस उपअधीक्षक अजित पाटील, तालुका पोलीस ठाण्याचे सहायक निरीक्षक राजेंद्र सानप यांनी घटनास्थळी भेट दिली. पोलीस उपनिरीक्षक जारवाल यांच्या पथकाने आरोपी रामेश्‍वर दशवंत व प्रियंका मोरे यांना अटक केली आहे. पुढील तपास उपनिरीक्षक जारवाल करीत आहे.

डिजिटल प्रभात आता टेलिग्रामवर! चॅनल जॉईन करा व मिळवा सर्व महत्वपूर्ण अपडेट्स, चॅनल जॉईन करण्यासाठी येथे क्लिक करा

Leave A Reply

Your email address will not be published.