वुहान : चीनमधील करोनाचा हैदोस काही केल्या थांबताना दिसत नाही. चीनमधून रोज धडकी भरवणारे आकडे समोर येत आहेत. नवीन माहितीनुसार चीनमध्ये मागच्या ३५ दिवसांत जवळपास ६० हजार लोकांचा मृत्यू ओढवला आहे. चीनमध्ये करोना नियमांमध्ये शिथीलता दिल्यानंतर प्रथमच एवढ्या मोठ्या प्रमाणात मृत्यूची आकडेवारी समोर येत असल्याने चिंतेचे वातावरण निर्माण झाले आहे.
राष्ट्रीय आरोग्य आयोग यांच्या ब्युरो ऑफ मेडिकल अॅडमिनिस्ट्रिशेनचे प्रमुख जिओ याहुई यांनी चीनमधील करोनामुळे झालेल्या मृत्यूंची माहिती दिली आहे. चीनमध्ये ८ डिसेंबर २०२२ पासून ते १२ जानेवारी २०२३ पर्यंत एकूण ५९,९३८ मृत्यू झाले आहेत. ही आकडेवारी फक्त हॉस्पिटलमध्ये मृत्यू झालेल्या रुग्णांची आहे. प्रत्यक्षात करोनामुळे झालेल्या मृत्यूची आकडेवारी यापेक्षा अधिक असू शकते, अशी शक्यता वर्तविण्यात येत आहे.
जिओ याहुई यांनी सांगितले की, करोना व्हायरसमुळे रेस्पिरेटरी फेल्युअर झाल्यामुळे ५ हजार ५०३ मृत्यू झाले आहेत. यासोबतच ५४ हजार ४३५ त्या लोकांचा समावेश आहे, ज्यांना करोना सोबतच इतर आजार देखील होती. डिसेंबरच्या सुरुवातीला चीनने आपले झिरो कोविड धोरण शिथील केले होते. त्यानंतर करोनाने चीनमध्ये थैमान घालायला सुरुवात केली, असा आरोप सध्या चीनवर केला जात आहे.
शनिवारी चीनमधील आरोग्य क्षेत्रात काम करणाऱ्या तज्ज्ञांनी सांगितले की, मृत झालेल्या नागरिकांची वयोमर्यादा ही सरासरी ८०.३ इतकी आहे. ज्यामध्ये ६५ वर्षाहून अधिक वय असलेले ९० टक्के लोक आहेत. मृतांमध्ये बहुतांश लोकांना इतर गंभीर स्वरुपाचे आजार होते. चीनमध्ये ६० वर्षांहून अधिक वय असलेल्या लाखो लोकांचे लसीकरण झालेले नाही, अशी माहिती मिळत आहे.