निमोणे(प्रतिनिधी) : निमोणे (ता. शिरुर) येथे घाटकोपर येथुन गावात आलेल्या ४७ वर्षीय व्यक्ती कोरोना बाधित सापडल्यानंतर त्याच्या कुटुंबातील दोन व्यक्तींचे स्वॅब घेऊन शुक्रवारी(दि.५) दुपारी तपासणीसाठी पाठवले होते.परंतु दोघांची कोरोनाचा अहवाल निगेटिव्ह आले असल्याने निमोणेकरांना दिलासा मिळाला आहे.
२६ मे रोजी मुंबई येथील घाटकोपर परिसरातून ३ जणांचं कुटुंब निमोणे येथे आलं होतं. त्यात ४७ वर्षीय व्यक्ती पत्नी आणि मुलाचा समावेश होता. निमोणे ग्रामपंचायतीच्या वतीने या तिघांनाही जिल्हा परीषद प्राथमिक शाळेत क्वारंटाईन करण्यात आले होते. ३० मे रोजी या ४७ वर्षीय व्यक्तीला त्रास होऊ लागल्याने आरोग्य खात्याने त्यांना पुणे येथे पाठविले होते तिथं तपासणी दरम्यान त्यांना कोरोना असल्याचे निष्पन्न झाले होते.
त्यानंतर निमोणे गाव व सभोवतालचा परीसर प्रतिबंधित क्षेत्र म्हणुन घोषित करण्यात आले असुन १४ दिवस दवाखाना व मेडिकल या अत्यावश्यक सेवा वगळता संपुर्ण गावातील दुकाने,बँका बंद ठेवण्यात आल्या आहेत. परंतु या दोन व्यक्तींचे अहवाल निगेटिव्ह आल्यामुळे निमोणे गावातील ग्रामस्थांना मोठा दिलासा मिळाला असल्याचे ग्रामसेवक विक्की पोळ व सरपंच बेबीताई भालेकर यांनी सांगितले.
निमोणे येथे १४ दिवसांसाठी गाव प्रतिबंधित क्षेत्र म्हणुन जाहीर केले आहे.परंतु गावात मोठया प्रमाणात बेकायदेशीररीत्या गावठी दारु विक्री होत.असुन दारुच्या अड्ड्यावर तळीरामांची गर्दी होत आहे.त्यामुळे पोलिसांनी यावर कडक कारवाई करावी अशी मागणी ग्रामस्थांनी केली आहे.