शेवगाव (प्रतिनिधी ) : तालुक्यातील आव्हाने बुद्रुक ,भातकुडगाव, दहिगावने, घोटण, वडुले बुद्रुक, व शिंगोरी या सहा गावात दहा पेक्षा अधिक सक्रिय करोना बाधित रुग्ण आढळल्याने जिल्हाधिकाऱ्यांनी या गावांना प्रतिबंधात्मक क्षेत्र म्हणून घोषित केले आहे. या गावात प्रांताधिकारी देवदत्त केकान, तहसीलदार छगनराव वाघ, गटविकास अधिकारी महेश डोके, तालुका आरोग्य अधिकारी डॉ . संकल्प लोणकर , आरोग्य विस्तार अधिकारी सुरेश पाटेकर यांनी प्रत्यक्ष भेटी देऊन प्रतिबंधात्मक उपाय योजनांची कडक अंमलबजावणी केली आहे.
या गावात अठरा वर्षा वरील सर्वांचे लसीकरण करण्याचे नियोजन करण्यात आले असून येथील शाळा अंगणवाड्या बंद करण्यात आल्या आहेत . विना मास्क आढळणाऱ्यावर दंडात्मक कारवाई करण्यात येत आहे. करोना विषाणूचा प्रसार रोखण्यासाठी येथे जीवनावश्यक सेवा वगळता इतर दुकाने, आस्थापना बंद ठेवण्यात आल्या आहेत. कृषिमाल व आवश्यक वस्तू वाहतूक वगळता इतर वाहनांना प्रतिबंधित करण्यात आले आहे.
आरोग्य पथके प्रत्येक घरोघरी भेटी देत असून कोव्हिड टेस्ट करण्यात येत आहेत . लक्षणे आढळून येणाऱ्या संबंधितास उपचारासाठी कोव्हिड केअर सेंटर मध्ये दाखल करण्यात येत आहे. सध्या लसीचा मुबलक पुरवठा होत असून 18 वर्षावरील व्यक्तीच्या लसीकरणासाठी मतदार याद्याचा आधार घेतला जात आहे. त्यासाठी गावा गावातील सामाजिक, राजकीय क्षेत्रातील कार्यकर्ते देखील प्रशासनाच्या मदती साठी सरसावले आहेत.
तहसीलदार वाघ यांनी व्यवसायिकांची बैठक घेऊन दुकानदार तसेच दुकानात काम करणाऱ्या कामगारांना लस घेणे बंधनकारक केले आहे. मोनिका राजळे, सभापती डॉ. क्षितीज घुले यांचेसह प्रशासनाने समन्वय साधून कोव्हिडला हद्दपार करण्यासाठी केलेल्या प्रयत्नामुळे तालुक्यातील 94 पैकी 45 ग्राम पंचायती,112 गावा पैकी 63 गावे करोना मुक्त झाली आहेत .
