Share Market Today: भारतीय रिझर्व्ह बँकेने (आरबीआय) व्याजदरात कपात केल्यानंतरही शेअर बाजारातील घसरणीचा कल आजही कायम राहिला. सेन्सेक्स आणि निफ्टी सलग तिसऱ्या दिवशी लाल रंगात बंद झाले. सेन्सेक्स 198 अंकांनी घसरला. तर निफ्टी 23,600 च्या खाली गेला. त्यामुळे आज गुंतवणूकदारांचे सुमारे 1.17 लाख कोटी रुपयांचे नुकसान झाले. बाजाराच्या अपेक्षेनुसार RBI ने व्याजदरात 0.25 टक्क्यांनी कपात केली. मात्र, असे असतानाही बँकिंग आणि वित्तीय समभागांचे निर्देशांक घसरणीसह बंद झाले. याशिवाय एफएमसीजी, ऑइल अँड गॅस आणि एनर्जीमध्येही जोरदार विक्री दिसून आली.
दुसरीकडे टेलिकॉम, कंझ्युमर ड्युरेबल्स आणि मेटल शेअर्समध्ये खरेदी दिसून आली. व्यापक बाजार संमिश्र राहिला. BSE मिडकॅप निर्देशांक 0.13 टक्क्यांनी वाढून बंद झाला. तर स्मॉलकॅप निर्देशांक 0.68 टक्क्यांनी घसरला.
व्यवहाराच्या शेवटी, बीएसई सेन्सेक्स 197.97 अंकांनी किंवा 0.25 टक्क्यांनी घसरून 77,860.19 वर बंद झाला. तर NSE चा 50 शेअर्सचा निर्देशांक निफ्टी 43.40 अंकांनी किंवा 0.18 टक्क्यांनी घसरला आणि 23,559.95 च्या पातळीवर बंद झाला.
गुंतवणूकदारांचे 1.17 लाख कोटी रुपयांचे नुकसान –
BSE वर सूचीबद्ध कंपन्यांचे एकूण बाजार भांडवल आज 7 फेब्रुवारी रोजी 423.80 लाख कोटी रुपयांपर्यंत खाली आले, जे त्याच्या आधीच्या ट्रेडिंग दिवशी म्हणजे गुरूवार, 6 फेब्रुवारी रोजी 424.97 लाख कोटी रुपये होते. अशा प्रकारे, BSE मध्ये सूचीबद्ध कंपन्यांचे मार्केट कॅप आज सुमारे 1.17 लाख कोटी रुपयांनी कमी झाले आहे. किंवा दुसऱ्या शब्दांत, गुंतवणूकदारांच्या संपत्तीत सुमारे 1.17 लाख कोटी रुपयांची घट झाली आहे.
या 5 सेन्सेक्स समभागांमध्ये सर्वाधिक वाढ –
आज, बीएसई सेन्सेक्सच्या 30 पैकी 14 शेअर्स हिरव्या रंगात म्हणजेच वाढीसह बंद झाले. यामध्ये टाटा स्टीलच्या शेअर्समध्ये सर्वाधिक 4.34 टक्के वाढ झाली आहे. यानंतर भारती एअरटेल, झोमॅटो, महिंद्रा अँड महिंद्रा (M&M) आणि अल्ट्राटेक सिमेंटचे समभाग 1.45 ते 3.60 टक्क्यांच्या वाढीसह बंद झाले.
सेन्सेक्सचे हे 5 समभाग सर्वाधिक घसरले –
सेन्सेक्समधील उर्वरित 16 समभाग आज घसरणीसह बंद झाले. यामध्येही ITC चे शेअर्स 2.38 टक्क्यांच्या घसरणीसह सर्वाधिक घसरले. तर स्टेट बँक ऑफ इंडिया (SBI), अदानी पोर्ट्स, टाटा कन्सल्टन्सी सर्व्हिसेस (TCS) आणि ICICI बँकेच्या शेअर्समध्ये 1.19 टक्क्यांपासून 2.03 टक्क्यांपर्यंत घसरण झाली.
सेन्सेक्सच्या उर्वरित समभागांची स्थिती पाहा-
