पुणे,{प्रभात वृत्तसेवा} – माजी आमदार विश्वास गांगुर्डे यांचे अल्पशा आजाराने निधन झाले. ते ८० वर्षांचे होते. त्यांच्या पश्चात पत्नी, मुलगी, जावई असा परिवार आहे. वैकुंठ स्मशानभूमीत त्यांच्यावर अंत्यसंस्कार झाले.
विश्वासरावांचे वडील कृष्णराव गांगुर्डे हे स्वातंत्र्यवीर सावरकर यांचे अतिशय जवळचे स्नेही होते.
त्यामुळे विश्वासरावांना स्वातंत्र्यवीर सावरकरांचा सहवास लाभला. १९७८ मध्ये दत्तवाडी- राजेंद्रनगरमधून ते पहिल्यांदा पुणे महापालिकेवर नगरसेवक म्हणून निवडून गेले. त्यानंतर १९९२-१९९७ काळात गणेशखिंड भागातून नगरसेवकपद भूषविले.
विश्वासराव हे विचारवंत आणि अभिव्यक्ती स्वातंत्र्याचे पुरस्कर्ते होते. त्यामुळे इंदिरा गांधी यांनी देशात आणीबाणी लागू केल्यानंतर त्याविरोधात त्यांनी मोठा संघर्ष उभा केला. १९९२-१९९५ या काळात ते पुण्याचे शहराध्यक्ष होते. भाजपा शहराध्यक्ष पदाच्या कार्यकाळात पक्षाचे कार्य शहराच्या तळागाळापर्यंत नेण्याचे काम त्यांनी केले. १९९९ मध्ये ते पर्वती विधानसभा मतदारसंघातून आमदार झाले. त्यांनी मतदारसंघातील अनेक प्रश्न सोडविले.
