सातारा – करोनाचा प्रादुर्भाव काही देशांमध्ये वाढू लागल्याने करोना प्रतिबंधात्मक बुस्टर डोसची मागणी वाढली होती. जिल्ह्यात कोविशिल्डचा बुस्टर डोस संपले होते. जिल्ह्याला दोन दिवसांपूर्वी दहा हजार बुस्टर डोस मिळाले असून शुक्रवारपासून (दि. 20) जिल्ह्यातील प्राथमिक आरोग्य केंद्रांना लसीचे वाटप होणार आहे.
करोनाचा प्रादुर्भाव कमी झाल्याने गेल्या काही दिवसांपासून नागरिकांनी बुस्टर डोस घेण्याकडे दुर्लक्ष केले होते. अनेक ठिकाणी लसीकरण केंद्रे बंद करुन केवळ प्राथमिक आरोग्य केंद्रातच लसींचे डोस देण्यात येत होते. वर्षभराचा कालावधी गेल्यानंतर आता काही देशांमध्ये करोनाचा प्रादुर्भाव पुन्हा वाढू लागल्याने बुस्टर डोस घेण्यासाठी नागरिकांची धवपळ वाढली आहे. दरम्यान, करोनाच्या दुसऱ्या टप्यात कोविशिल्ड लसींची संख्या कमी प्रमाणात होती. त्यामुळे कोविशिल्डला पर्यायी लस म्हणून कॉर्बिव्हॅक्‍स लस दिली जात होती.
या दोन्ही लस संपल्याने नागरिकांची अडचण झाली होती. दोन दिवसापूर्वी कोविशिल्ड लशीचे डोस उपलब्ध झाले आहेत. जिल्ह्यात 99 टक्के नागरिकांनी लसीचा पहिला डोस घेतला आहे. दुसरा डोस 98 टक्‍यांहून अधिक नागरिकांनी घेतला आहे. मात्र, बुस्टर डोसपासून जिल्ह्यात अद्यापही 14 लाख 31 हजार नागरिक वंचित राहिले आहेत. ज्या नागरिकांनी दुसरा डोस घेतला नाही अशांनी तत्काळ लस घ्यावी, असे आवाहन आरोग्य विभागाच्यावतीने करण्यात आले आहे.
जगातील काही देशांमध्ये करोनाचा प्रादुर्भाव दिसून आल्याने सतर्कता बाळगण्यात येत आहे. करोना लसीकरणाला आरोग्य विभागाने प्राधान्य दिले आहे. कोविशिल्डचे दहा हजार बुस्टर डोस उपलब्ध झाले असून कोव्हॅक्‍सिन लस शिल्लक आहे. दुसरा डोस व बुस्टर राहिला आहे त्या नागरिकांनी लस घ्यावी.
डॉ. वैशाली आव्हाड-बडदे, जिल्हा आरोग्य अधिकारी
