मल्हारपेठ – संचार बंदी व जमावबंदी आदेशाचा भंग करून 25 व्यक्तींची आयशर ट्रक मधून अवैध प्रवाशी वाहतूक केल्याबद्दल पाटण पोलिसांत गुन्हा दाखल झाला आहे. याबाबत पोलिसांची माहिती अशी, शशिकांत भगवान जानकर (वय 39 वर्षे रा. चोराडे, ता खटाव जि. सातारा) हा आज दुपारी 12.30 चे सुमारास पाटण तालुक्यातील चोपदारवाडी ते कुसरूंड रस्त्यावरून (आयशर ट्रक क्र एम एच 04 एफ पी 741) मधून मोठी 19 व लहान मुले 9 अशा 25 प्रवाशांची अवैध वाहतूक करीत निघाला होता.
सध्या करोना विषाणूचा संसर्ग रोखण्यासाठी जिल्हाधिकारी यांनी जिल्हा आपत्ती आपत्ती व्यवस्थापन प्राधिकरण समितीच्या जमावबंदी व संचारबंदी आदेशाचा भंग व अवैध प्रवाशी वाहतूक करून सार्वजनिक उपद्रव केल्या प्रकरणी तसेच राष्ट्रीय आपत्ती व्यवस्थापन कायदा कलम प्रमाणे गुन्हा दाखल करण्यात आला आहे. फिर्याद पोलीस कॉन्स्टेबल मुकेश मोरे यांनी दिली असून तपास हवालदार पाटील करीत आहेत.