लोणंद : लोणंदमधील गायरान क्षेत्रातील एक हेक्टर जागेत मियावाकी पद्धतीने गार्डन विकसित करण्याचा निर्णय लोणंद नगरपंचायतीच्या सर्वसाधारण सभेमध्ये घेण्यात आला.
नगरपंचायत कार्यालयात काल दि. १७ रोजी झालेल्या या सभेत सर्वागीण विकासासाठी महत्त्वाचे निर्णय घेण्यात आले. अध्यक्षस्थानी नगराध्यक्ष मधुमती गालिंदे होत्या. उपनगराध्यक्ष गणीभाई कच्छी उपस्थित होते. मुख्याधिकारी दत्तात्रय गायकवाड यांनी सभेसमोर सर्व प्रस्तावांची माहिती दिली. मदत व पुनर्वसन मंत्री ना. मकरंद पाटील यांच्या विशेष प्रयत्नातून नगरपंचायत हद्दीतील विविध विकास कामांसाठी ७३२.५० लाख रुपये प्राप्त झाले आहेत. त्यातील या विविध विकास कामांबाबतचा ठराव यावेळी मंजूर करण्यात आले.
मियावाकी गार्डन तयार करण्याबाबतचा ठराव मंजूर करण्यात आला. गायरान क्षेत्रात मियावाकी पद्धतीने विकसित होणारे गार्डन म्हणजे पर्यावरण रक्षणासाठी आणि जैवविविधता वाढविण्यासाठी एक महत्त्वपूर्ण उपक्रम ठरणार आहे. या पद्धतीने लावलेली झाडे पारंपरिक वृक्षारोपणाच्या तुलनेत दहापट जलद वाढतात आणि २- ३ वर्षात दाट जंगल निर्माण होते.
या गार्डनमुळे हवामान सुधारते, प्रदूषण नियंत्रणासाठी ते मदत करते, पावसाचे पाणी मुरवते आणि भूगर्भातील जलस्तर स्थिर ठेवते. स्थानिक पक्षी, फुलपाखरे व कीटकांसाठी हे गार्डन एक सुरक्षित अधिवास बनेल. यामुळे शाळा, महाविद्यालये व नागरिकांना नैसर्गिक शिक्षणाची संधी मिळेल आणि एक निसर्गसंपन्न पर्यटनस्थळही निर्माण होईल. लोणंदच्या हरित विकासासाठी हा प्रकल्प एक प्रेरणादायी पाऊल ठरेल, असे मत सभेत व्यक्त करण्यात आले.
अग्निशामक केंद्रासाठी जागा निश्चित करण्यात आली. यासाठी १.७१ कोटी इतका निधी मंजूर आहे. तसेच लोणंद रेल्वे स्टेशनला भारतरत्न डॉ. बाबासाहेब आंबेडकर यांचे नाव देण्याबाबत ठराव मंजूर करण्यात आला. लोणंद नगरपंचायत हद्दीतील प्रभाग क्र. ११ मध्ये शास्त्री चौक येथे वॉटर एटीएम बसविण्यात येणार आहे. प्रभाग क्र. १५ मधील प्रसूतिगृहाशेजारील जागेत बगिचा विकसित करण्यात येणार आहे.
यासाठी शासनाच्या वैशिष्ट्यपूर्ण योजनेअंतर्गत ४५ लाख रुपये मंजूर आहेत. तसेच नगरपंचायतींच्या विहिरींची पाणी पातळी उषणतेमुळे कमी झाली असल्याने शहरातील विविध भागात पाणी टंचाई घोषित करण्याबाबतचा ठराव मंजूर झाला. जिल्हा वार्षिक योजना (सर्वसाधारण) व अनुसूचित जाती उपघटक योजना २०२५- २६ अंतर्गत विविध विकास कामे निश्चित करण्याचा अधिकार नगराध्यक्षांना देण्यात आला.
बांधकाम सभापती सुप्रिया शेळके, पाणी पुरवठा सभापती सचिन शेळके, नगरसेवक रवींद्र रमेश क्षीरसागर, शिवाजीराव शेळके पाटील, दीपाली संदीप शेळके, रशिदा शब्बीरभाई इनामदार, दीपाली निलेश शेळके, भरत शेळके, राजश्री शेळके पाटील, तृप्ती घाडगे, ज्योती डोनीकर, सीमा वैभव खरात, भरत बोडरे, प्रवीण व्हावळ, आनंदराव शंकरराव शेळके पाटील, नगरपंचायतीचे सर्व विभाग प्रमुख उपस्थित होते.
लोणंदचा लक्षणीय विकास होणार
या सर्व विकासकामांमुळे सार्वजनिक वाहतूक, स्वच्छता, पर्यावरण व नागरी सुविधा क्षेत्रांत लोणंद शहराचा लक्षणीय विकास होणार आहे, असे नगराध्यक्ष सौ. मधुमती गालिंदे यांनी सांगितले. या कामांची अंमलबजावणी वेळेत आणि गुणवत्तापूर्ण करण्यात येईल, असे मुख्याधिकारी दत्तात्रय गायकवाड यांनी सांगितले.
