जिल्हा परिषद सभेत सदस्यांची एकमुखी मागणी; शासनाकडे प्रस्ताव पाठवण्याचा निर्णय
सातारा (प्रतिनिधी) -जिल्ह्यात करोनाचा प्रादुर्भाव मोठ्या प्रमाणात वाढला असताना ऑक्सिजन, व्हेंटिलेटर, बेड उपलब्ध होत नाहीत अशी विदारक परिस्थिती आहे. त्यामुळे 14 व्या वित्त आयोगाच्या रकमेवरील व्याजातून प्रतिकारशक्ती वाढवण्याची औषधे खरेदी करण्याऐवजी प्रत्येक तालुक्याच्या ठिकाणी शंभर ऑक्सिजन बेडचे कोव्हिड सेंटर उभारा, अशी एकमुखी मागणी पदाधिकारी व सदस्यांनी जिल्हा परिषदेच्या सर्वसाधारण सभेत केली. याबाबत शासनाकडे सोमवारी प्रस्ताव पाठवून ग्रामविकास मंत्री हसन मुश्रीफ यांच्याशी चर्चा करुन हा प्रश्न मार्गी लावण्यात येईल, असे आश्वासन अध्यक्ष उदय कबुले यांनी दिले.
जिल्हा परिषदेची सर्वसाधारण सभा अध्यक्ष उदय कबुले यांच्या अध्यक्षतेखाली बुधवारी व्हिडिओ कॉन्फरन्सिंगद्वारे झाली. शिक्षण सभापती मानसिंगराव जगदाळे, कृषी सभापती मंगेश धुमाळ, समाजकल्याण सभापती सौ. कल्पना खाडे, मुख्य कार्यकारी अधिकारी संजय भागवत, अतिरिक्त मुख्य कार्यकारी अधिकारी संतोष धोत्रे, उपमुख्य कार्यकारी अधिकारी मनोज जाधव, अविनाश फडतरे आदी उपस्थित होते. महिला व बालकल्याण सभापती सौ. सोनाली पोळ यांच्यासह अनेक सदस्य व्हीसीद्वारे सहभागी झाले. 14 व्या वित्त आयोगांतर्गत ग्रामपंचायतींना वितरित केलेल्या रकमेवरील व्याजाच्या रकमेतून प्रतिकारशक्ती वाढवण्यासाठी “अर्सेनिक अल्बम 30′ आणि आयुर्वेदिक संशमनीवटी, युनानी औषध खरेदी करण्याच्या सूचना ग्रामविकास विभागाने केल्या होत्या.
या औषधांचे वाटप करण्याऐवजी प्रत्येक तालुक्याच्या ठिकाणी 100 ऑक्सिजन बेडचे कोव्हिड सेंटर उभारावे, अशी मागणी सदस्यांनी या सभेत केली. उदय कबुले, मंगेश धुमाळ, संजीवराजे नाईक निंबाळकर, भीमराव पाटील, वसंतराव मानकुमरे, सौ. अर्चना देशमुख, डॉ. सौ. भारती पोळ, अरुण गोरे यांच्यासह पदाधिकारी, सदस्यांनी सध्याच्या करोनाच्या बिकट परिस्थितीत कोव्हिड सेंटरसाठी आग्रही भूमिका घेतली. याबाबत जिल्हा परिषदेकडून ग्रामविकास विभागास प्रस्ताव पाठवण्यात येणार आहे. शासनाने व्याजाचे सुमारे सात कोटी रुपये यासाठी खर्च करण्यास परवानगी द्यावी, अशी मागणी शासनाकडे करण्याचा निर्णय या सभेत झाला. या कामात दिरंगाई न करता आठ दिवसांच्या आत हा प्रश्न मार्गी लावून जिल्हावासियांना मदतीचा हात द्यावा, अशी मागणी संजीवराजे यांनी केली. सध्याच्या बिकट परिस्थितीत ऑक्सिजन बेड, रेडिमेसीवर इंजेक्शन, व्हेंटिलेटर याची जास्त आवश्यकता असल्याने तसा शासनाकडे प्रस्ताव देण्यात येणार असून सोमवारी ग्रामविकास मंत्र्यांशी बोलून हा प्रश्न मार्गी लावण्यात येईल, असे कबुले यांनी सभागृहात सांगितले.
होम आयसोलेशनमधील रुग्णांना जिल्हा परिषदेमार्फत कीट देण्याचा निर्णय झाला होता. अद्याप कीट मिळत नसल्याचे भीमरावकाका पाटील यांनी निदर्शनास आणून दिले. आरोग्य विभागात सध्या अधिकारी, कर्मचाऱ्यांची कमतरता असून कीट पोहचवण्याबाबत सूचना करण्यात आल्याचे कबुले यांनी सांगितले. जिल्हा शल्यचिकित्सक डॉ. सुभाष चव्हाण, जिल्हा आरोग्य अधिकारी डॉ. अनिरुद्ध आठल्ये यांनी करोना परिस्थितीचा आढावा घेतला. रेडीमेसीवर इंजेक्शन जास्तीत जास्त लोकांना उपलब्ध करुन देण्याचा प्रयत्न असल्याचे डॉ. चव्हाण यांनी सांगितले. मुख्य कार्यकारी अधिकाऱ्यांनी लक्ष घालून आरोग्य विभागातील रिक्त पदे तात्काळ भरावीत, अशी मागणी भीमराव पाटील यांनी केली. रोगप्रतिकारशक्ती वाढीच्या गोळ्या घेण्याऐवजी तालुक्यांच्या ठिकाणी 100 ऑक्सिजन बेडसह कोव्हिड सेंटर उभारण्याबाबत शासनाकडे प्रस्ताव पाठवण्यात येणार आहे. याबाबत शासन जो निर्णय देईल त्यांची अंमलबजावणी करण्याचे अधिकार सर्वसाधारण सभेने स्थायी समितीला द्यावेत, अशी सूचना कृषी सभापती मंगेश धुमाळ यांनी मांडली. या सूचनेला सदस्यांनी सहमती दिली.
हद्दवाढ आणि अभिनंदनाचे ठराव
सातारा नगरपालिकेची हद्दवाढ आ. शिवेंद्रराजे भोसले यांच्या पाठपुराव्यामुळे झाल्याने त्यांच्या अभिनंदनाचा ठराव घेण्यात यावा, अशी मागणी सातारा पंचायत समितीच्या सभापती सौ. सरिता इंदलकर यांनी केली. पुष्कर कार्यालयात करोना सेंटर उभारल्याबद्दल आ.शिवेंद्रराजे भोसले व सौ. वेदांतिकाराजे भोसले यांच्या अभिनंदनाचा ठराव सौ. इंदलकर यांनी मांडला. सातारची हद्दवाढ खा. उदयनराजे भोसले यांच्या पाठपुराव्यामुळे झाल्याने त्यांच्या अभिनंदनाचा ठराव सदस्या सौ. अर्चना देशमुख यांनी मांडला. खंडाळा पंचायत समितीच्या सभापतींनी मुख्यमंत्री उध्दव ठाकरे आणि उपमुख्यमंत्री अजित पवार यांना या कामाचे श्रेय देवून त्यांच्या अभिनंदनाचा ठराव मांडला. एकंदर सातारा नगरपालिकेच्या हद्दवाढीवरुन जिल्हा परिषदेतही श्रेयवाद रंगला.