यशवंतनगर – कोपर्डे हवेली (ता. कराड) गावाच्या हद्दीत पहाटे पाचच्या सुमारास रेल्वे गेट क्र. ९७ मधून अजमेर एक्सप्रेसला ऊस वाहतूक करणाऱ्या ट्रॅक्टरची धडक झाली, असा संदेश गेटमनकडून कराड रेल्वे स्टेशनला प्राप्त झाला. त्यानंतर रेल्वे अधिकाऱ्यांसह रेल्वे पोलीस व संबंधित यंत्रणेची तारांबळ उडाली व त्यांनी तातडीने घटनास्थळाकडे धाव घेतली.
समोर आलेल्या माहितीनुसार, कोपर्डे हवेली येथील परिसर नजिकच्या रेल्वे गेट नं.९७ वर पहाटे साडेपाच वाजता मोठा आवाज झाला. त्यापाठोपाठ रुग्णवाहिका आणि पोलीस गाडीच्या सायरनच्या आवाजाने स्थानिकांच्या मनात धडकी भरली. दरम्यान, पुण्याकडून मिरजकडे जाणाऱ्या अजमेर एक्सप्रेसला ऊस वाहतुक करणाऱ्या ट्रॅक्टरची धडक दिल्याची माहिती गेटमन नरेंद्र मीना यांनी कराड रेल्वे स्टेशनचे स्टेशन मास्तर अमरीश कुमार यांना दिली. यानंतर स्टेशन मास्तरांनी ही माहिती रेल्वे सुरक्षा बल, रुग्णवाहिका व स्थानिक पोलीस प्रशासनाला कळवली.
ही माहिती मिळताच रेल्वे प्रशासन अलर्ट झाले. आर.पी.एफ, सिग्नल विभाग, टेलिकॉम, इंजिनिअरिंग, टी.आर.डी विभागातील अधिकारी घटनास्थळी पोहोचले. पाहणी करून मिळालेल्या माहितीची खातरजमा केली असता, प्रत्यक्ष अपघात झाला नसून अतिरिक्त विभागीय रेल्वे व्यवस्थापक व अतिरिक्त विभागीय सुरक्षा अधिकारी यांच्या मार्गदर्शनाखाली मॉक ड्रिल घेण्यात आल्याचे लक्षात येताच सर्वांनी सुटकेचा निःश्वास सोडला.
अजमेर एक्सप्रेस पाऊण तास उशिरा धावली…
प्रत्यक्ष घटना घडल्याचे भासवण्यासाठी व अधिकाऱ्यांना घटनेचे गांभीर्य लक्षात यावे, यासाठी पुण्यावरून मिरजकडे जाणारी अजमेर एक्सप्रेस माॅक ड्रील दरम्यान गेट नंबर ९७ वर जवळपास पाऊण तास थांबवून ठेवण्यात आली होती.
स्थानिकांचा जीव टांगणीला…
पहाटे साडेपाचच्या सुमारास रेल्वे गेट नंबर ९७ परिसरात फटाके वाजवून मोठा आवाज करण्यात आला होता व पाठोपाठ रुग्णवाहिका व पोलीस गाड्यांच्या आवाजाने नागरिकांची झोप उडाली. नक्की काय झाले, हे न समजल्याने स्थानिकांचा जीव टांगणीला लागला होता.
