Ahilyanagar Crime : अहिल्यानगर जिल्ह्यातील संगमनेर तालुक्यात एक अत्यंत संतापजनक घटना घडली असून, सहावीत शिकणाऱ्या अल्पवयीन मुलीवर ॲसिड हल्ला करण्यात आला आहे. या घटनेनंतर संपूर्ण परिसरात खळबळ उडाली आहे. मिळालेल्या माहितीनुसार, संगमनेर तालुक्यातील वडगाव पान येथील शाळेत शिकणारी ही विद्यार्थिनी शाळा सुटल्यानंतर घरी जात असताना अज्ञात तरुणाने तिच्या चेहऱ्यावर ॲसिड फेकले. अचानक झालेल्या या हल्ल्यामुळे मुलगी गंभीर जखमी झाली. घटनेनंतर मुलीच्या आरडाओरडीनंतर स्थानिक नागरिकांनी तातडीने धाव घेतली. जखमी मुलीला तात्काळ उपचारासाठी लोणी येथे हलविण्यात आले आहे. तिच्यावर उपचार सुरू असून तिची प्रकृती चिंताजनक असल्याची माहिती समोर येत आहे. दरम्यान, घटनेची माहिती मिळताच पोलिसांनी घटनास्थळी धाव घेत तपास सुरू केला आहे. ॲसिड हल्ला करणारा आरोपी फरार असून त्याचा शोध सुरू आहे. या घटनेमुळे परिसरात भीतीचे वातावरण निर्माण झाले आहे. काही दिवसांपूर्वीच संगमनेर तालुक्यातील रणखांब येथे लग्नाला नकार दिल्याने एका मुलीवर प्राणघातक हल्ल्याची घटना घडली होती. त्यानंतर पुन्हा घडलेल्या या प्रकारामुळे कायदा-सुव्यवस्थेवर प्रश्नचिन्ह निर्माण झाले आहे. गोंदियात सूडातून तरुणाची निर्घृण हत्या गोंदिया जिल्ह्यातील गोरेगाव तालुक्यात जुन्या वैमनस्यातून एका तरुणाची तलवारीने निर्घृण हत्या करण्यात आली. मृत तरुणाचे नाव भुरु उर्फ देवेंद्र ताराम (वय २५) असे असून, तो पालेवाडा हेटी गावातील रहिवासी होता. सुमारे ९ महिन्यांपूर्वी देवेंद्रने जादूटोण्याच्या संशयातून आरोपी सुनील कांबळे याच्या वडिलांची हत्या केली होती. दरम्यान, काही दिवसांपूर्वी जामिनावर सुटल्यानंतर देवेंद्र गावात परतला होता. याच पार्श्वभूमीवर सुनील कांबळे याने सूड उगवण्याच्या हेतूने त्याच्यावर हल्ला करत तलवारीने सपासप वार केले. गंभीर जखमांमुळे देवेंद्रचा जागीच मृत्यू झाला. घटनेनंतर आरोपीने पोलीस पाटलांसमोर आत्मसमर्पण केले असून, गोरेगाव पोलिसांनी गुन्हा दाखल करून पुढील तपास सुरू केला आहे.