मुंबई : शिवसेनाप्रमुख बाळासाहेब ठाकरेंच्या जयंतीदिनाचे औचित्य साधून शिवसेना (उध्दव बाळासाहेब ठाकरे) पक्षाच्या अज्ञात कार्यकर्त्याने कल्याण डोंबिवली महापालिका मुख्यालयासमोर एक मोठा फ्लेक्स लावला आहे. या फ्लेक्समुळे चांगलाच गोंधळ उडाला आहे.य फ्लेक्समध्ये कार्यकर्त्याने बंडखोरी केलेल्या आमदारांवर टीकास्त्र उगारले आहे.
पालिकेच्या बाहेर लावण्यात आलेल्या फ्लेक्सवर, ‘साहेब मी गद्दार नाही..४० गद्दारांना गाडून त्याच उमेदीने उभे राहू’ असे लिहिण्यात आले आहे. या फलकावरुन शिंदे गट आणि ठाकरे गट यांच्यात तणावाचे वातावरण निर्माण झाल्यानंतर पालिका आणि पोलिसांनी तात्काळ तो फलक त्या ठिकाणावरून काढण्यात आला.
शिवसेनाप्रमुखांच्या जयंतीचे औचित्य साधून शिवसेनेच्या उध्दव बाळासाहेब ठाकरे, बाळासाहेबांची शिवसेना पक्षाच्या कार्यकर्त्यांनी शहराच्या विविध भागात फलक लावून शुभेच्छा दिल्या आहेत. डोंबिवली, कल्याण शहराच्या विविध भागात दोन्ही पक्षाच्या शिवसैनिकांनी विविध प्रकारचे कार्यक्रम आयोजित केले होते.
शांततेने दोन्ही पक्षांकडून शिवसेनाप्रमुखांच्या जयंतीचे कार्यक्रम सुरू असताना, पालिका मुख्यालयासमोर पक्षप्रमुख उध्दव ठाकरे यांच्या पक्षातील अज्ञात शिवसैनिकाने ‘साहेब मी गद्दार नाही. गेलेल्या ४० गद्दारांना गाडून पु्न्हा त्याच उमेदीने उभे राहू. तेव्हाच तुम्हाला खऱ्या अर्थाने अभिवादन केले याचे समाधान आमच्या सारख्या शिवसैनिकांना होईल,’ अशा आशयाचा मजकूर असलेला फलक लावला.
