नवी दिल्ली -सध्या देशात करोनाची दुसरी लाट आली असून, ऑक्सिजनची भयंकर टंचाई निर्माण झाली आहे. अशा परिस्थितीत भारताचा माजी महान क्रिकेटपटू सचिन तेंडुलकर करोनाविरोधातील लढ्यासाठी पुढे सरसावला आहे. सचिनने “मिशन ऑक्सिजन’साठी तब्बल एक कोटी रुपयांची मदत केली आहे.
सचिन तेंडुलकरने मिशन ऑक्सिजन या मोहिमेसाठी 1 कोटी रुपयांची मदत केली आहे. 250 उद्योजक तरुणांनी सुरू केलेल्या या मोहिमेत सचिनने सहभाग घेतला आहे. यापूर्वी गेल्या वर्षीही सचिनने अशीच मदत केली होती. तेव्हा त्याने पंतप्रधान साह्यता निधी आणि महाराष्ट्रातील मुख्यमंत्री साह्यता निधीसाठी प्रत्येकी 25 लाख रुपयांचा निधी दिला होता.
मिशन ऑक्सिजन मोहिमेसाठी एक कोटी रुपयांची मदत करत असल्याची माहिती सचिनने ट्विटरद्वारे दिली. तसेच, मी खेळत असताना तुमच्याकडून मिळालेला पाठिंबा अमूल्य होता, त्यामुळे मी यश मिळवू शकलो. आज आपण करोनाविरोधात लढणाऱ्यांच्या मागे ठामपणे उभं राहण्याची आणि त्यांना पाठिंबा देण्याची वेळ आहे, अशा आशयाचा संदेशही यावेळी त्याने दिला आहे.
दरम्यान, काही दिवसांपूर्वी रोड सेफ्टी क्रिकेट सीरिजमध्ये सहभागी झाल्यानंतर सचिनलाही करोनाची लागण झाली होती. ही स्पर्धा संपवून घरी आल्यावर सचिनला करोना झाल्याचे स्पष्ट झाले आहे. नंतर करोनामधून सावरल्यावर अलीकडेच त्याने प्लाझ्मादेखील दान करण्याचे आवाहन केले होते.
एक व्हिडिओ शेअर करून मी प्लाझ्मा दान करणार असून, तुम्हीही प्लाझ्मा दान करायला हवे, असे आवाहन केले होते. दरम्यान, सचिन तेंडुलकरशिवाय इतर काही भारतीय आणि आयपीएलमध्ये खेळणाऱ्या काही परदेशी खेळाडूंनीही करोनाविरोधातील लढ्यात मदत केली आहे.