बाख्रमत (युक्रेन) – रशियाच्या पौजांनी पूर्व युक्रेनमधअये जोरदार आघाडी उघडल्यामुळे आता युक्रेनच्या नागरिकांनी देश सोडून पळून जाण्याचा वेग वाढवला आहे. सातत्याने होत असलेले रशियाचे हवाई हल्ले आणि तोफगोळ्यांचा मारा यामुळे नागरिकांमध्ये भीतीचे वातावरण निर्माण झाले आहे.
बायका, मुले आणि ज्येष्ठ नागरिकांना कार्यकर्ते मिळेल त्या मार्गाने सुरक्षित ठिकाणी हलवत आहेत. आजारी आणि म्हाताऱ्या लोकांना व्हिलचेअर आणि स्ट्रेचरवरून हलवले जात आहे. रेल्वेच्या माध्यमातून या शरणार्थ्यांना अन्य शहरांमध्ये हलवण्याचे प्रयत्न सुरू आहेत. अमेरिका आणि ब्रिटनमधील रेफ्युज ईज या स्वयंसेवी संघटनेचे कार्यकर्ते शरणार्थ्यांच्या स्थलांतराला मदत करत आहेत. याशिवाय युक्रेनमधील वोस्तोक एसओएस या संघटनेचे कार्यकर्तेही पूर्व युक्रेनमध्ये विस्थापितांना मदत करत आहेत.
बाख्रमत शहरातील बहुतेक नागरिकांनी स्थलांतर केले आहे. युद्धाला सुरुवात होण्यापूर्वी 85 हजार लोकसंख्या असलेल्या या गावात आता केवळ 30 हजार जण शिल्लक आहेत. रशियाच्या फौजा सिव्हरोडोनेत्सक आणि लिसेंचान्सक या शहरांच्या अगदी समीप येऊन पोचले आहेत. तर रशियाचे समर्थन असलेल्या बंडखोरांनी लेमॅन शहराचा ताबा घेतला आहे. अजूनही काही गावातील लोक आपले घर सोडून जायला तयार नाहीत. काही ज्येष्ठ नागरिकांना अक्षरशः बळजबरीने ओढून सुरक्षित ठिकाणी नेण्याची वेळ कार्यकर्त्यांवर आली आहे.
