मॉस्को – युक्रेनविरोधात सुरू असलेल्या युद्धासंदर्भात रशिया वाटाघाटीला तयार आहे. मात्र युक्रेन आणि युक्रेनचे पाश्चात्य पाठीराखे या वाटाघाटींना तयार नसल्याचे रशियाचे अध्यक्ष ब्लादिमीर पुतीन यांनी म्हटले आहे. स्वीकारण्यायोग्य तोडग्याबाबत या युद्धाशी संबंधित सर्वांशी वाटाघाटी करायला आपण तयार आहोत. मात्र या वाटाघाटी युक्रेनवर अवलंबून आहेत. वाटाघाटींना आम्ही नकार देत नाही आहोत. तर ते (युक्रेन) नकार देत आहेत, असे पुतीन यांनी रशियातील वृत्तवाहिनीशी बोलताना सांगितले.
पुतीन यांनी जरी वाटाघाटींची तयारी दाखवली असली तरी वाटाघाटींबाबत पुतीन गंभीर नसावेत, असे अमेरिकेची गुप्तहेर संघटना “सीआयए’ने म्हटले आहे. जगातील सर्व संघर्षांवर वाटाघाटीने तोडगा काढता येऊ शकतो. मात्र या वाटाघाटींबाबत पुतीन गंभीर असल्याचे जाणवत नसल्याचे “सीआयए’चे संचालक विल्यम बर्न्स यांनी म्हटले आहे.
अमेरिकेच्या नेतृत्वाखाली पाश्चात्य देश रशियाला संपवण्याचा प्रयत्न करत आहेत. त्यामुळे आमच्या देशाला आणि आमच्या नागरिकांच्या हिताचे रक्षण आम्हाला करावेच लागते आहे. आमच्या जनतेला वाचवण्यासाठी युक्रेनमध्ये रशिया करत असलेली कारवाई योग्यच आहे, असे पुतीन यांनी म्हटले आहे. मात्र रशियाच्या विघटनासाठी अमेरिका प्रयत्नशील असल्याचा आरोप अमेरिकेने फेटाळला आहे.
रशिया आणि पाश्चात्यांच्या भूमिकेमुळे युद्धाला धोकादायक वळण लागत असल्याची शक्यता पुतीन यांनी फेटाळली आहे. पाश्चात्यांनी 2014 मध्ये युक्रेनमध्ये आपली मोहीम सुरू केली. युक्रेनमधील रशियाच्या मर्जीतील सरकारविरोधात आंदोलन पेटवण्यात आले आणि त्यानंतर रशियाने क्रिमियाचा ताबा घेतला होता. त्यानंतर रशियाच्या पाठिंब्याने बंडखोरांनी युक्रेनच्या फौजांविरोधात संघर्ष सुरू केला होता.
युद्ध समाप्त होण्याची शक्यता धूसर…
आपली सर्व उद्दिष्टे साध्य होईपर्यंत आपला संघर्ष असाच सुरू राहील, असे रशियाने यापूर्वी म्हटले होते. तर आपल्या भूमीवरील रशियाच्या प्रत्येक सैनिकाला संपवल्याशिवाय हे युद्ध थांबणार नाही, असे युक्रेनने म्हटले आहे. रशियाने 2014 मध्ये ताब्यात घेतलेल्या क्रिमियालादेखील मुक्त केले जाईल, तरच युद्ध थांबेल, असे युक्रेनने म्हटले आहे. त्यामुळे हे युद्ध समाप्त होण्याची आशा अगदी धूसर दिसत असल्याचे युद्ध निरीक्षकांचे म्हणणे आहे.