नवी दिल्ली : वृत्तसंस्था – बँकिंग क्षेत्रातून एक मोठी बातमी समोर आली आहे. रिझर्व्ह बँक ऑफ इंडिया म्हणजेच आरबीआयने तीन कंपन्यावर मोठी कारवाई केली आहे, ज्या आर्थिक सेवा पुरवण्याचं काम करतात. RBI ने व्हिसा वर्ल्डवाइड, ओला फायनान्शिअल सर्व्हिस आणि मणप्पुरम फायनान्सला दंड ठोठावला आहे.
का करण्यात आली कारवाई?
पीएसओ मणप्पुरम आणि ओला फायनान्शिअल सर्व्हिसेसवर आपल्या ग्राहकांचं केवायसी न केल्याने कारवाई करण्यात आली. व्हिसा वर्ल्डवाइड प्रायव्हेट लिमिटेडने केंद्रीय बँकेकडून मंजुरी न घेताच पेमेंट ऑथेंटिफिकेशन सॉल्यूशन लागू केल्याने त्यांच्यावर ही कारवाई करण्यात आली.
किती रुपयांचा ठोठावला दंड?
आरबीआयने व्हिसा वर्ल्डवाइड प्रायव्हेट लिमिटेडवर 2.4 कोटी आणि मणप्पुरम फायनान्स लिमिटेडवर 41.5 लाखांचा दंड ठोठावला आहे. तसंच ओला फायनान्शिअल सर्व्हिसवर दोन वेगवेगळ्या नियमांकडे दुर्लक्ष केल्याने 33.40 लाख रुपये आणि 54.15 लाखांचा दंड ठोठावला आहे.
