लंडन – भारतीय संघाच्या मुख्य प्रशिक्षकपदी असलेल्या रवी शास्त्रींची मुदत लवकरच संपत आहे. त्यांच्या जागी राहुल द्रविड यांची नियुक्ती होणार या चर्चेने जोर धरला होता. मात्र, आता या चर्चेला पूर्णविराम मिळाला असून सध्याच्या सपोर्ट स्टाफमध्ये असलेल्या माजी कसोटीपटू विक्रम राठोड यांचे नाव आघाडीवर असल्याचे सांगितले जात आहे.
शास्त्री यांचा करार यावर्षीच्या टी-20 विश्वकरंडक स्पर्धेनंतर संपुष्टात येणार आहे. त्यानंतर ते हे पद पुन्हा स्वीकारणार नसल्याचे स्पष्ट झाले आहे. त्याचवेळी श्रीलंका संघासह प्रशिक्षक म्हणून गेलेल्या द्रविड हेच या पदावर नियुक्त केले जाणार असल्याचे बोलले जात आहे.
मात्र, राष्ट्रीय क्रिकेट अकादमीच्या संचालक (एनसीए) पदाची मुदत संपल्यानंतर द्रविड यांनीच पुन्हा अर्ज दाखल केल्याने त्यांचे नाव या चर्चेतून बाद झाले. त्याचवेळी कर्णधार विराट कोहली याच्यासह बीसीसीआयचे पदाधिकारी तसेच निवड समितीचे सगळे सदस्य राठोड यांच्याबाबत अनुकुल असल्याचे सांगितले जात आहे.
सध्या राठोड हे भारतीय संघाचे फलंदाजी प्रशिक्षक आहेत. यंदा अमिरातीत होत असलेल्या आयसीसी टी-20 क्रिकेट विश्वकरंडक स्पर्धेनंतर शास्त्री यांच्यासह संपूर्ण सपोर्ट स्टाफचा कार्यकाळ संपत आहे.