Ramesh Hinge : महिलांचा लैंगिक छळ करणाऱ्या स्वयंघोषित ज्योतिषी आणि आध्यात्मिक गुरु अशोक खरात प्रकरणात नवा ट्विस्ट समोर आला आहे. खरात यांचा अत्यंत जवळचा विश्वासू आणि खासगी सचिव (पीए) म्हणून ओळखला जाणारा रमेश हिंगे (Ramesh Hinge) गेल्या पाच दिवसांपासून फरार असल्याची चर्चा होती. मात्र आता हिंगे (Ramesh Hinge) यांनी समोर येत एका वृत्तवाहिनीला मुलाखत दिली आहे. या मुलाखतीत त्यांनी खरात यांच्या फार्महाऊसवर मंत्री, उच्च पदस्थ अधिकारी आणि प्रतिष्ठित व्यक्ती कशा पद्धतीने येत असत, याबाबत महत्त्वाचे खुलासे केले आहेत. काय म्हणाले रमेश हिंगे? रमेश हिंगे यांनी स्पष्टपणे सांगितले की, “मी एक शिक्षक आहे. मी कधीही अशोक खरात यांचा खासगी सचिव (पीए) नव्हतो आणि आत्ताही नाही. मी त्यांचा मॅनेजरही नाही. मी फक्त सुट्टीच्या दिवशी ईशान्येश्वर मंदिरात स्वयंसेवक म्हणून जात असे. तिथे अनेक अधिकारी आणि मान्यवर येतात, त्यांना बघण्यासाठी मी जात असे. खरात यांच्या इतर काळ्या कारनाम्यांशी माझा काहीही संबंध नाही. मी त्यांच्या कोणत्याही संस्थेत कोणत्याही पदावर नाही – ट्रस्टी नाही, मॅनेजर नाही, पीएही नाही.” हिंगे यांनी पुढे सांगितले की, ते ईशान्येश्वर मंदिराबरोबरच अशोक खरात यांच्या फार्महाऊसवरही जात असत. फार्महाऊसवर पाण्यासाठी आणि बागेच्या देखभालीसाठी ते जात असल्याचे त्यांनी स्पष्ट केले. Ashok Kharat Case फार्महाऊसवरील वातावरणाबाबत बोलताना रमेश हिंगे म्हणाले, “रविवारी माझ्यासारखे अनेक भाविक फार्महाऊसवर असायचेच. त्यांना खरात यांच्या दर्शनासाठी किंवा त्यांना बघण्यासाठी यायचे. आमचे काम फक्त स्वयंसेवक म्हणून चहा-पाणी देणे एवढेच होते. अशोक खरात प्रत्येक रविवारी फार्महाऊसवर असायचे. काही वेळा ते फक्त बाहेर असायचे, तर कधी महिनाभरही तिथे नसायचे.” मंत्री आणि अधिकारी येत असत – हिंगेंचा दावा हिंगे यांनी सर्वांत महत्त्वाचा खुलासा करताना सांगितले, “फार्महाऊसवर येणारे लोक चांगल्या प्रकारचे प्रतिष्ठित आणि मान्यवर होते. हा ग्रामीण भाग असल्याने आम्हाला या मोठ्या लोकांना बघण्याची उत्सुकता असायची, म्हणून आम्ही जात असू. येथे जे कोणी मान्यवर यायचे, त्यांना मी ओळखतो. पण वैयक्तिकरित्या कोणाचे नाव सांगणे योग्य होणार नाही. मात्र, यामध्ये मंत्री आणि मोठे-मोठे अधिकारी येत होते, हे मी (Ramesh Hinge) स्पष्ट करतो.” रमेश हिंगे यांनी हेही सांगितले की, ते फक्त स्वयंसेवक म्हणून काम करत असत आणि खरात यांच्या कथित काळ्या जादू, उपचार किंवा महिलांवर होणाऱ्या अत्याचारांशी त्यांचा काहीही संबंध नाही. या प्रकरणाने महाराष्ट्राच्या राजकीय आणि प्रशासकीय वर्तुळात मोठी खळबळ माजवली असून, खरात यांच्या फार्महाऊसला भेट देणाऱ्या मंत्री आणि अधिकाऱ्यांच्या यादीबाबत चर्चा सुरू झाली आहे. पोलीस लवकरच रमेश हिंगे यांना अधिकृतपणे चौकशीसाठी बोलावण्याची शक्यता आहे. त्यामुळे या प्रकरणात आणखी कोणाची नावे समोर येतात, याकडे सर्वांचे लक्ष लागले आहे.
