अहमदाबाद – आयपीएल स्पर्धेत आज मुंबई इंडियन्स आणि गुजरात जायंट्स यांच्यात क्वालिफायर 2 ची लढत होणार आहे. या सामन्यात जो संघ जिंकेल तो येत्या रविवारी चेन्नई सुपर किंग्जविरुद्ध अंतिम सामना खेळेल.
गुजरातचा संघ बलाढ्य मानला जात असला तरीही पहिल्या क्वालिफायरमध्ये त्यांना चेन्नईकडून पराभव पत्करावा लागला होता. त्या उलट सरुवातीपासून चाचपडत असलेल्या मुंबई इंडियन्सने नंतरच्या सामन्यांत कमालीचे सातत्य राखले आहे. तसेच त्यांनी एलिमिनेटर लढतीत लखनौ सुपर जायंट्सला धूळ चारत क्वालिफायरच्या दुसऱ्या सामन्यात स्थान मिळवले.
गुजरात टायटन्स विरुद्ध मुंबई इंडियन्स
वेळ – संध्याकाळी 7ः30 पासून
ठीकाण – अहमदाबाद
थेट प्रक्षेपण – स्टार स्पोर्टस
दोन्ही संघांचे बलाबल पाहिले तर गुजरातचा संघ कागदावर बलाढ्य मानला जात असला तरीही प्रत्यक्ष सामन्यात त्यांच्या प्रमुख फलंदाजांनी निराशाच केली आहे. केवळ शुभमन गिलने फलंदाजीत तर, रशीद खानने गोलंदाजीसह फलंदाजीतही चमक दाखवली आहे. दुसरीकडे मुंबईच्या पहिल्या पाचही फलंदाजांनी सातत्य राखले आहे. तसेच त्यांच्या गोलंदाजांनीही आपल्यावरील विश्वास सार्थ केला आहे. त्यामुळे या सामन्यात मुंबईचे पारडे काहीसे जड राहणार आहे.
यंदाच्या स्पर्धेत अंतिम फेरी गाठण्यासाठी दोन्ही संघात जबरदस्त चुरस पाहायला मिळण्याची अपेक्षा आहे. मात्र, त्यातही चेन्नईविरुद्ध गुजरातचा संघ ज्या पद्धतीने ढेपाळला होता ते पाहता मुंबईने मोठी धावसंख्या उभारली तर त्यांना विजयासाठी फारसे कष्ट पडणार नाहीत. मात्र, हा सामना 170 ते 185 धावांचा झाला व गुजरातचा संघ धावांचा पाठलाग करत असेल तर गिल व रशीद यांना रोखण्यासाठी मुंबईच्या गोलंदाजांना अत्यंत शिस्तबद्ध गोलंदाजी करावी लागेल.
कमकुवत दुवे
मुंबई
– रोहितच्या सातत्याचा अभाव
– सूर्यकुमारचे बेजबाबदारपणे बाद होणे
– कॅमेरुन ग्रीनचे फिरकीसमोर चाचपडणे
– ईशान किशनला येत असलेले अपयश
– ख्रिस जॉर्डनचा ओसरलेला फॉर्म
गुजरात
– कर्णधार पंड्या व मिलरचे अपयश
– पंड्याचा गोलंदाजी न करण्याचा निर्णय
– तेवतिया व शनाकाचा बेजबाबदारपणा
– ढीसाळ क्षेत्ररक्षण
– साहाचे अनाकलनिय यष्टीरक्षण
भक्कम दुवे
मुंबई
– ग्रीनची वादळी फलंदाजी
– सूर्यकुमारची आक्रमकता
– आकाश मधवालची अनप्लेयेबल गोलंदाजी
– तिलक व निहालचा फॉर्म
– बेहरेनड्रॉफ व चावलाची गोलंदाजी
गुजरात
– गिलचा अफलातून फॉर्म
– विजय शंकरची आक्रमकता
– शमी व रशीदची भेदक गोलंदाजी
– नूर अहमदची अचुक फिरकी
– मोहित शर्माचा अचुक मारा
खेळपट्टी व हवामान
कडक उन्हाळा असल्याने कोरड्या खेळपट्टीवर मोठी धावसंख्या उभारली जाण्याची शक्यता. संध्याकाळच्या सत्रात दव निर्णायक ठरेल. नाणेफेक जिंकणारा संघ पहिल्यांदा फलंदाजी करणे पसंत करेल.
रशीद व गिल ट्रम्पकार्ड ठरतील
डावातील सुरीवातीच्या षटकात शुभमन गिल तर अखेरच्या षटकांमध्ये रशीद खान अविश्वसनिय फटकेबाजी करतात हे त्यांनी या संपूर्ण स्पर्धेत सिद्ध केले आहे. त्यांना रोखण्याचेच आव्हान मुंबईसोर राहणार आहे.
नेतृत्वाचा कस लागणार
मुंबईला पाचवेळा विजेता बनवणारा कर्णधार रोहित शर्मा व पदार्पणातच गुजरातला विजेतेपद मिळवून देणारा कर्णधार हार्दिक पंड्या यांच्या नेतृत्वाचीही कसोटी या सामन्यात लागणार आहे. गिल, रशीदला रोखण्यासाठी मधवालचा कसा वापर करायचा त्यासाठी रोहितला योजना तयार करावी लागेल. दुसरीकडे ग्रीन, ईशान, टीम डेव्हीडविरुद्ध सापळा तयार करण्याचे काम पंड्याला करावे लागणार आहे.