Bus Accident News : उत्तर प्रदेशातील पूर्वांचल एक्सप्रेसवेवर सोमवारी एक भीषण अपघात झाला. पानीपतहून बिहारच्या अररियाकडे जाणारी स्लीपर कोच बस अनियंत्रित होऊन उलटली. या दुर्घटनेत ७ जणांचा मृत्यू झाला असून ४० हून अधिक प्रवासी जखमी झाले आहेत. जखमींपैकी काहींची प्रकृती गंभीर असल्याने त्यांना लखनऊच्या केजीएमयू ट्रॉमा सेंटरमध्ये हलवण्यात आले आहे. अपघात गोसाईगंज पोलीस ठाण्याच्या हद्दीत अलियारपूर परिसरात घडला. बसमध्ये सुमारे ४० ते ५० प्रवासी होते. काही प्रवाशी झोपलेले असताना हा अपघात झाला. प्राथमिक माहितीनुसार, भरधाव वेगात असलेल्या बस चालकाचे नियंत्रण सुटले आणि बस उलटून खोल दरीत कोसळली. या घटनेत अनेक प्रवासी बसच्या आत अडकले. घटनेची माहिती मिळताच पोलीस, आपत्ती व्यवस्थापन दल आणि स्थानिक बचाव पथके घटनास्थळी दाखल झाली. क्रेनच्या मदतीने बस उचलण्याचे काम सुरू झाले. अडकलेल्या प्रवाशांना बाहेर काढण्यासाठी शर्थीचे प्रयत्न केले. जखमींना प्रथम सीएचसी गोसाईगंज येथे उपचार करण्यात आले. या अपघाताचा पोलीस तपास करत आहेत. या घटनेने प्रवाशांमध्ये भीतीचे वातावरण पसरले आहे.