पुणे महापालिका कंत्राटदारांना जीएसटीचा परतावा नाही

प्रशासनाच्या भोंगळ कारभारामुळे लक्षावधींचा फटका


करभरणावेळी वैयक्‍तिक जीएसटी क्रमांक टाकला जात नाही

पुणे – पुणे महापालिकेत कंत्राटदारांना निविदा अर्जांची विक्री करताना वस्तू सेवा कराची (जीएसटी) आकारणी केली जाते. मात्र, महापालिका प्रशासनातर्फे जीएसटी विभागाकडे करभरणा करताना संबंधित कंत्राटदाराचा वैयक्‍तिक जीएसटी क्रमांक टाकला जात नाही. त्यामुळे कंत्राटदारांना भरलेल्या जीएसटीचा परतावा (क्रेडिट) मिळत नसल्याचा धक्‍कादायक प्रकार माहिती अधिकारात उघड झाला आहे.

महापालिका प्रशासनाच्या या भोंगळ कारभारामुळे कंत्राटदारांना लक्षावधी रुपयांचा फटका सहन करावा लागत आहे. त्यामुळे करभरणा करताना कंत्राटदारांचा जीएसटी क्रमांक टाकण्यात यावा. त्यामुळे कंत्राटदारांना त्यांचा परतावा मिळण्यास मदत होईल, अशी मागणी केली जात आहे.

महापालिका प्रशासनातर्फे दरवर्षी विविध कामांसाठी शेकडो निविदा काढण्यात येतात. या निविदांचे अर्ज कंत्राटदारांना महापालिकेच्या टेंडर सेलकडून खरेदी करावे लागतात. या अर्जांच्या विक्रीवर महापालिकेतर्फे जीएसटी आकारला जातो.
देशात 1 जुलै 2017 पासून जीएसटीची “एक देश-एक कर’ प्रणाली लागू करण्यात आली. मात्र, तेव्हापासून आजतागायत एकाही कंत्राटदाराला अर्जांसाठी भरलेल्या जीएसटीचा परतावा मिळाला नसल्याच्या तक्रारी केल्या जात होत्या. त्या पार्श्‍वभूमीवर “सजग नागरिक मंच’तर्फे माहिती अधिकारात टेंडर सेल आणि महापालिकेच्या अर्थ विभागाकडे कागदपत्रांची पाहणी केली. त्यामध्ये या तक्रारींत तथ्य आढळून आल्याचा दावा मंचातर्फे करण्यात आला. महापालिकेच्या टेंडर सेलकडून जीएसटी विभागाकडे एकत्रित करभरणा करताना कंत्राटदारांचा वैयक्‍तिक जीएसटी क्रमांक टाकला जात नाही.

परिणामी, कंत्राटदारांना परताव्यापासून वंचित राहावे लागते. टेंडर सेलच्या या चुकीमुळे कंत्राटदारांना वर्षाकाठी लक्षावधी रुपयांचा फटका बसत असल्याचा आरोप मंचाने केला आहे. या संदर्भात “सजग’चे विवेक वेलणकर आणि विश्‍वास सहस्रबुद्धे यांनी महापालिका आयुक्‍त सौरभ राव यांना निवेदन दिले असून, या प्रकरणाची चौकशीची आणि दोषींवर कारवाईची मागणी केली आहे. तसेच, कंत्राटदारांना त्यांचा परतावा मिळावा, यासाठी यापुढे प्रत्येक कंत्राटदाराचा वैयक्‍तिक जीएसटी नोंदणी क्रमांक टाकूनच महापालिकेने करभरणा करावा, अशी सूचनाही केली आहे

डिजिटल प्रभातचे टेलिग्राम जॉईन करण्यासाठी येथे क्लिक करा

You might also like

Leave A Reply

Your email address will not be published.