पुणे – आयआयटी, एनआयटी प्रवेशासाठी अनिवार्य जेईई ऍडव्हान्स परीक्षेच्या निकालात पुण्याचा चिराग फलोर हा देशात पहिला आहे. चिरागने अमेरिकेतील मॅसेच्युसेट्स इन्स्टिट्यूट ऑफ टेक्नॉलॉजीमध्ये (एमआयटी) मार्च महिन्यात प्रवेश घेतला आहे. त्याचे ऑनलाइन क्लास सुरू झाले आहेत.
दिल्ली “आयआयटी’तर्फे 27 सप्टेंबर रोजी देशभरात “जेईई ऍडव्हान्स’ची परीक्षा घेण्यात आली. यासाठी 1 लाख 60 हजार 838 जणांनी नोंदणी केली होती. त्यापैकी 1 लाख 50 हजार 838 जणांनी परीक्षा दिली.
त्याचा निकाल सोमवारी सकाळी ऑनलाइन जाहीर झाला. 43 हजार 204 विद्यार्थी “आयआयटी’ प्रवेशासाठी पात्र ठरले आहेत. यामध्ये 6 हजार 707 विद्यार्थिनी आहेत. या निकालात चिराग फलोर याने 396 पैकी 352 गुण घेऊन देशात पहिला क्रमांक मिळवला. तर कनिष्का मित्तल हिने 315 गुण घेऊन मुलींमध्ये पहिला क्रमांक पटकावला, तिचा देशात सतरावा रॅंक आहे.
पुण्यातील कल्याणीनगर येथील सेंट अरनॉड सेंट्रल स्कुलमध्ये चिरागचे शिक्षण झाले. त्याने इयत्ता 9वीपासून “आयआयटी’ प्रवेशासाठी बेसिक तयारी सुरू केली होती. त्यानंतर अकरावीला गेल्यानंतर दिल्ली येथे जेईईची तयारी सुरू केली. दि. 13 सप्टेंबर रोजी जेईई मेन्सचा निकाल जाहीर झाला. त्यामध्ये चिरागने 300 पैकी 296 गुण घेऊन देशात 12वा रॅंक मिळवला होता. तर, दिल्ली एनसीटीमध्ये प्रथम आला होता. त्यानंतर झालेल्या जेईई ऍडव्हानमध्ये त्याने देशात पहिला क्रमांक पटकावला.
पंतप्रधानांकडून चिरागचा मित्र म्हणून उल्लेख
चिराग फलोर याने आधीही राष्ट्रीय स्तरावर चांगली कामगिरी केली आहे. त्याला राष्ट्रीय बाल पुरस्कारदेखील देण्यात आला आहे. त्याने राष्ट्रीय आणि आंतरराष्ट्रीय गणित व विज्ञान स्पर्धा जिंकल्या आहेत. खगोलशास्त्र आणि खगोलशास्त्र विषयक आंतरराष्ट्रीय ऑलिम्पियाड स्पर्धांमध्ये त्याने भारताचे प्रतिनिधित्व केले आहे. यापूर्वी जेईई मेन परीक्षेत चिराग देशात 12 व्या स्थानी होता. त्यानिमित्ताने जानेवारी महिन्यात पंतप्रधान नरेंद्र मोदींनी त्यांच्या ट्विटर अकाऊंटवरुन चिरागला शुभेच्छा दिल्या होत्या. ट्विटमध्ये पंतप्रधानांनी चिरागचा मित्र म्हणून उल्लेख केला होता.
पहिले दहा टॉपर
1. चिराग फलोर, 2. गांगुला रेड्डी, 3. वैभव राज, 4. आर मुहेंदर राज, 5. केशव अग्रवाल, 6. हार्दिक राजपाल, 7. वेदांग असगावकर, 8. समय चोबे, 9. हर्षवर्धन अगरवाल, 10. धवनीत बेनीगल.
इयत्ता नववीपासून जेईई ऍडव्हान्सची प्राथमिक तयारी सुरू केली होती. बारावीत असताना फक्त मॉक टेस्टद्वारे प्रश्न सोडविण्याचा सराव केल्याने हे यश मिळाले. पण मी “आयआयटी’ मध्ये प्रवेश घेणार नाही. “एमआयटी’मध्ये शिकण्याचे माझे लहानपणापासूनचे स्वप्न होते. एमआयटीत माझा प्रवेश निश्चित झाला आहे. सध्या माझे ऑनलाइन क्लास सुरू असून, जानेवारी महिन्यात अमेरिकेला जाणार आहे.
– चिराग फलोर, देशात प्रथम आलेला विद्यार्थी