Pune Traffic : पुणे शहर वाहतूक पोलीस यांनी अक्षय तृतीया व आंबा महोत्सवाच्या पार्श्वभूमीवर शहरातील मध्यवर्ती भागात मोठ्या प्रमाणात भाविकांची गर्दी होण्याची शक्यता लक्षात घेऊन वाहतुकीत तात्पुरते बदल जाहीर केले आहेत. रविवार, दि. १९ एप्रिल रोजी हे बदल सकाळी ७ वाजल्यापासून गर्दी ओसरत नाही तोपर्यंत लागू राहणार आहेत. (Pune Traffic) श्रीमंत दगडूशेठ हलवाई गणपती मंदिर येथे दर्शनासाठी मोठी गर्दी अपेक्षित असल्याने शिवाजी रोड, लक्ष्मी रोड आणि परिसरातील इतर रस्त्यांवर वाहतूक कोंडी होण्याची शक्यता व्यक्त करण्यात आली आहे. यामुळे वाहतूक सुरळीत ठेवण्यासाठी पोलिसांनी नियोजन केले आहे. (Pune Traffic) वाहतुकीतील प्रमुख बदल शिवाजी रोडवरून स्वारगेटकडे जाणाऱ्या पीएमपीएमएल बसना स. गो. बर्वे चौक → जंगली महाराज रोड → खंडोजीबाबा चौक → टिळक रोड असा पर्यायी मार्ग देण्यात आला आहे. स. गो. बर्वे चौकातून पुणे मनपा भवनकडे जाणाऱ्या बसना जंगली महाराज रोडमार्गे झाशी राणी चौकातून वळवण्यात येईल. आप्पा बळवंत चौक ते बुधवार चौक हा मार्ग बंद ठेवण्यात येणार असून वाहतूक बाजीराव रोडने वळवली जाईल. गणेश रोडमार्गे दास्याला पुलाकडे जाणाऱ्या बसना गाडगीळ पुतळा → कुंभारवेस चौक → पवळे चौक मार्ग देण्यात येईल. गणेश रोडवरून जिजामाता चौकाकडे जाणारी वाहतूक अपोलो टॉकीज → नरपतगिरी चौक → दारुवाला पूल → दुधभट्टी मार्गे वळवण्यात येईल. वाहतूक उप आयुक्त हिम्मत जाधव यांनी नागरिकांना आवाहन केले आहे की, गर्दीच्या काळात शक्यतो मध्यवर्ती भाग टाळावा आणि पोलिसांनी सुचवलेल्या पर्यायी मार्गांचा वापर करावा. अत्यावश्यक सेवेतील वाहने वगळता इतर वाहनांवर निर्बंध लागू राहतील. सदर बदलांबाबतची माहिती पुणे शहर पोलीस यांच्या अधिकृत संकेतस्थळ व सोशल मीडियावरही उपलब्ध करून देण्यात आली आहे. (Pune Traffic)