पुणे : राष्ट्रीय परीक्षा प्राधिकरणातर्फे (एनटीए) १५ जानेवारीला घेण्यात येणारी विद्यापीठ अनुदान आयोग – राष्ट्रीय पात्रता परीक्षा (यूजीसी नेट) पुढे ढकलण्यात आली आहे. या परीक्षेची नवी तारीख स्वतंत्रपणे जाहीर करण्यात येणार आहे.
दरम्यान, १६ जानेवारीची परीक्षा आधीच्याच नियोजनानुसार होणार असल्‍याचे “एनटीए’चे संचालक राजेश कुमार यांनी सांगितले.यूजीसी नेट परीक्षा डिसेंबर आणि जून अशी वर्षातून दोनवेळा घेण्यात येते. यूजीसी नेट या परीक्षेद्वारे सहायक प्राध्यापक पदासाठीची आणि कनिष्ठ संशोधन पाठ्यवृत्तीची पात्रता, तसेच पीएच.डी.साठी पात्रता ठरवली जाते.
या परीक्षेसाठी ८५ विषय उपलब्ध असतात. डिसेंबर सत्राची परीक्षा ३ जानेवारी ते १६ जानेवारी या कालावधीत घेण्यात येत आहे. मात्र, मकर संक्रांत आणि पोंगल आणि सण असल्याने १५ जानेवारी रोजी होणारी परीक्षा पुढे ढकलण्याची मागणी करण्यात आली होती.
