Pune Tanker Point – एरंडवणे येथील पटवर्धन बागेतील महापालिकेच्या टँकर पॉइंटवरील पाणीमापक मीटर १६ डिसेंबर २०२५ पासून बंद असल्याचे पाहणीत आढळून आल्याने मोफत टँकरद्वारे होणाऱ्या पाणीपुरवठ्याच्या पारदर्शकतेवर प्रश्नचिन्ह निर्माण झाले आहे. याप्रकरणी क्रिएटिव्ह फाउंडेशनचे अध्यक्ष संदीप खर्डेकर यांनी महापालिका आयुक्त नवलकिशोर राम यांच्याकडे खुलासा करण्याची मागणी केली आहे. महापालिकेकडून सोसायट्या किंवा वस्त्यांमध्ये मागणीनुसार मोफत टँकरने पाणीपुरवठा केला जातो. पटवर्धन बागेतील या टँकर पॉइंटवरून प्रभाग क्रमांक १०, ११, २९, ३०, ३१, ३२ आणि ३३ या विस्तृत भागात पाणीपुरवठा केला जातो. मात्र, मीटर बंद असल्याने नेमके किती टँकर भरले आणि किती पाण्याचे वितरण झाले, याचा अचूक हिशेब कसा ठेवला जातो, असा सवालही खर्डेकर यांनी उपस्थित केला आहे. काही वर्षांपूर्वीही अशाच प्रकारातील गैरव्यवहार सजग नागरिकांनी उघडकीस आणला होता. त्या वेळी गुप्त चित्रीकरणात नोंदवहीत १८ टँकरची नोंद असताना प्रत्यक्षात ५० टँकर भरल्याचे दिसून आले होते. त्यानंतर सर्व टँकर पॉइंटवर मीटर बसविण्यात आले. आता पुन्हा मीटर बंद अवस्थेत असल्याने पाणीपुरवठा व्यवस्थेतील नियंत्रणाबाबत शंका व्यक्त केली जात आहे. टँकरद्वारे पाणीपुरवठा झाल्यानंतर संबंधित सोसायटी किंवा वस्तीतील पदाधिकारी अथवा नागरिकांची पावतीवरील सही घेतली जात नसल्याचे त्यांनी सांगितले. सर्व पाॅइंटची तपासणी करा शहरातील सर्व टँकर पॉइंटची तातडीने तपासणी करून सर्व मीटर कार्यरत असल्याची खात्री करावी. प्रत्येक मोफत टँकर पुरवठ्यानंतर संबंधित लाभार्थ्यांची सही घेणे बंधनकारक करावे आणि कोणाच्या मागणीवरून टँकर पाठविला, याची नोंद ठेवावी, अशी मागणी करून पाणीपुरवठा योजनेअंतर्गत भविष्यात लाखो पाणीमीटर बसविण्यात येणार असताना महापालिकेच्या स्वतःच्या टँकर पॉइंटवरील मीटर महिनोनमहिने बंद राहात असतील, तर संपूर्ण व्यवस्थेची अचूकता कशी राखणार असा प्रश्नही खर्डेकर यांनी उपस्थित केला आहे.