पुणे : मागेल त्यांना नवीन वीजजोडणी त्वरीत देण्यात यावी. महावितरण व वीजग्राहकांचे आर्थिक नुकसान टाळण्यासाठी आणि अचूक बिलिंगसाठी नादुरुस्त व सदोष वीजमीटर तातडीने बदलण्यात यावेत, असे निर्देश महावितरणचे अध्यक्ष लोकेश चंद्र यांनी आज दिले.
पुणे येथील “प्रकाशभवन’ कार्यालय येथे आयोजित पुणे प्रादेशिक विभागातील विविध कामांच्या आढावा बैठकीत ते बोलत होते. यावेळी पुणे प्रादेशिक संचालक भुजंग खंदारे, मुख्य अभियंता राजेंद्र पवार, धर्मराज पेठकर, स्वप्निल काटकर, प्रभारी महाव्यवस्थापक माधुरी राऊत यांची प्रमुख उपस्थिती होती.
लोकेश चंद्र म्हणाले, नादुरुस्त किंवा सदोष वीजमीटरमुळे महावितरण व ग्राहकांना आर्थिक फटका बसतो. वीजग्राहकांना मासिक वीजवापर देखील अचूक कळत नाही. त्यामुळे असे वीजमीटर बदलण्यास वेग देण्यात आला आहे. नवीन वीजमीटर मुबलक प्रमाणात उपलब्ध आहेत.
सुमारे ८५ ते ९० टक्के वीजग्राहक नियमित वीजबिल भरतात. मात्र, उर्वरित १० ते १५ टक्के ग्राहक वीजबिल भरण्याकडे दरमहा दुर्लक्ष करतात. त्यामुळे थकबाकी वाढत जाते. अशा ग्राहकांवर लक्ष केंद्रीत करून थकबाकी वसुलीवर भर द्यावा. प्रामुख्याने उच्चदाब वर्गवारीमध्ये ग्राहकांकडे थकबाकी वाढणार नाही, याची दक्षता घ्यावी. त्यांची थकबाकी अनामत रकमेएवढी झाल्यास वीजपुरवठा कायमस्वरूपी खंडित करण्याची कार्यवाही करावी, असे लोकेश चंद्र यांनी स्पष्ट केले.