फुरसुंगी : गेल्या दोन-तीन दिवसांपूर्वी भेकराईनगर पोलिस चौकालगतच भरचौकात हडपसर-सासवड मार्गावर बेशिस्त वाहन चालकांना शिस्त लावण्याचा प्रयत्न करणाऱ्या वाहतूक पोलीस कर्मचाऱ्याच्या डोक्यात दगड मारून प्राणघातक हल्ला केल्याची घटना घडली होती. फुरसुंगी पोलिसांनी याप्रकरणातील आरोपीच्या उस्मानाबाद येथुन मुसक्या आवळल्या आहेत. एवढंच नाही तर ज्याठिकाणी हल्ला केला त्या ठिकाणाहूनच गुडघ्यांवर चालत धिंड काढुन पोलिसांनी कायदा मोडणाऱ्यांना एकप्रकारे इशारा दिला आहे.
आदिनाथ ऊर्फ बबलू भागवत मसाळ (रा. कोलवडी, मुरकुटे वस्ती) असं अटक करण्यात आलेल्या आरोपीचे नाव आहे. आरोपीला उस्मानाबाद येथून अटक करून भेकराई नगर येथून आज सायंकाळच्या सुमारास धिंड काढण्यात आली. यावेळी फुरसुंगी पोलिस स्टेशनच्या वरिष्ठ पोलिस निरीक्षक मंगल मोढवे उपस्थित होत्या. फुरसुंगीतील भेकराईनगर चौकात गुरुवारी सायंकाळी ही घटना घडली असून पोलीस हवालदार राजेश गणपत नाईक (वय ४७) गंभीर जखमी झाले होते.
फोनवर बोलत दुचाकी चालवणाऱ्याला रोखल्याने आरोपीने चक्क वाहतूक पोलीस कर्मचाऱ्यांवरच हल्ला केला. रस्त्यात पडलेला दगड उचलून आरोपीने कर्मचाऱ्यांच्या डोक्यात घातला. त्याला पकडून त्याची धिंड फुरसुंगी पोलिसांनी काढून पोलिसांवर हल्ला केल्यावर काय होते हे दाखवून दिले.
