पुणे – शहर परिसरात वाहनचोरी करणाऱ्या पती – पत्नीला सिंहगड रोड पोलिसांच्या पथकाने लोणी काळभोर भागातील वडकीनाला येथून अटक केली. दोघांकडून १२ लाख ७० हजार रुपये किंमतीची तब्बल १७ वाहने जप्त करण्यात आली असून,
यामध्ये ८ चारचाकी आणि ९ दुचाकी वाहनांचा समावेश आहे. अटक केलेले आरोपी हे रेकॉर्डवरील असून मागील जवळपास दोन महिन्यांपासून सिंहगड रोड पोलिस त्यांचा शोध घेत होते.
शाहरुख राजू पठाण (२४, रा. कुंजीरवाडी), आयशा शाहरुख पठाण उर्फ पूजा जयदेव मदनाल ( २१, मुळ सोलापूर) अशी अटक करण्यात आलेल्यांची नावे आहेत. दोघांनी मिळून शहरातील सिंहगड रोड, हडपसर, वारजे माळवाडी, कोरेगाव पार्क भागातून वाहने चोरल्याचे समोर आले आहे.
आरोपींनी शहर परिसरातून चोरलेली वाहने नागपूर, शिर्डी, श्रीरामपूर भागात विकल्याचे समोर आले आहे. पोलिसांच्या पथकाने या भागात जाऊन ही वाहने जप्त केली. वाहने विकून मिळालेल्या पैशातून आरोपींनी मौजमजा केली.
मागील काही दिवसांपासून सिंहगड रस्ता भागातून वाहने चोरीला जाण्याच्या घटनात वाढ झाली होती. या पार्श्वभूमीवर परिमंडळ तीनचे पोलीस उपायुक्त संभाजी कदम, वरिष्ठ निरीक्षक विजय कुंभार यांनी आरोपींना पकडण्याचा सूचना केल्या होत्या.
तेव्हापासून पोलिसांनी परिसरात गस्त वाढवून आरोपींचा माग काढण्यास सुरुवात केली. तांत्रिक तपासावरुन हे वाहनचोरीचे गुन्हे एक पुरुष व एक महिला मिळून करीत असल्याचे निष्पन्न झाले.
त्यानुसार सहायक निरीक्षक सचिन निकम, उपनिरीक्षक संतोष भांडवलकर यांचे पथक हद्दीत गस्तीवर असताना वाहन चोरीचे गुन्हे करणारे आरोपी हे लोणी काळभोर परिसरातील वडकीनाला येथे असल्याची माहिती अंमलदार उत्तम तारू, राहुल ओलेकर, शिवाजी क्षीरसागर यांना मिळाली.
त्यानुसार पथकाने सापळा रचून आरोपी शाहरुख आणि आयेशा यांना ताब्यात घेतले. त्यांच्याकडे केलेल्या तपासात त्यांनी वाहनचोरीचे गुन्हे केल्याची कबुली दिली. त्यानुसार पोलिसांनी त्यांना अटक करून त्यांच्या ताब्यातून चोरीची १७ वाहने जप्त केली.
तर, विविध पोलीस ठाण्यातील १७ गुन्हे उघडकीस आले आहेत. आरोपी हे रेकॉर्डवरील असून त्यांनी संगनमताने शहरातील विविध भागात गुन्हे केल्याचे समोर आले आहे.
ही कामगिरी पोलीस आयुक्त अमितेश कुमार, अपर पोलीस आयुक्त प्रविण पवार, पोलीस सह आयुक्त प्रविणकुमार पाटील, उपायुक्त संभाजी कदम , सहायक आयुक्त जगदिश सातव, वरिष्ठ पोलीस निरीक्षक विजय कुंभार यांच्या मार्गदर्शनाखाली सहा. पोलीस निरीक्षक सचिन निकम,
उप निरीक्षक संतोष भांडवलकर, पोलीस अंमलदार आबा उत्तेकर, संजय शिंदे, उत्तम तारु, राजु वेगरे, विकास बांदल, अमोल पाटील, विकास पांडोळे, देवा चव्हाण, शिवाजी क्षीरसागर, राहुल ओलेकर, सागर शेडगे, स्वप्नील मगर, विनायक मोहीते, शिरीष गावडे यांचे पथकाने केली.
