Pune News – केंद्रीय लोकसेवा आयोगाने (यूपीएससी) वर्ष २०२७ मधील विविध स्पर्धा परीक्षा आणि भरती चाचण्यांचे अधिकृत वार्षिक वेळापत्रक जाहीर केले आहे. यामुळे प्रशासकीय सेवेत जाण्याची महत्त्वाकांक्षा बाळगणाऱ्या उमेदवारांना अभ्यासाचे नियोजन करता येणार आहे. देशातील अत्यंत प्रतिष्ठेची नागरी सेवा पूर्व परीक्षा आणि भारतीय वनसेवा पूर्व परीक्षा ही संयुक्तपणे २३ मे २०२७ रोजी घेतली जाईल. या परीक्षेची अधिकृत अधिसूचना १३ जानेवारी २०२७ रोजी निघणार असून, उमेदवारांना २ फेब्रुवारी २०२७ पर्यंत अर्ज दाखल करता येईल. पूर्वपरीक्षेत यश मिळवणाऱ्या उमेदवारांसाठीची मुख्य परीक्षा २० ऑगस्ट २०२७ पासून, तर वनसेवेची मुख्य परीक्षा २१ नोव्हेंबर २०२७ पासून सुरू होईल. याशिवाय वर्षभरात इंजिनिअरिंग, वैद्यकीय आणि संरक्षण दलातील विविध महत्त्वाच्या परीक्षांचे आयोजन केले जाणार आहे. परीक्षेच्या तारखांमध्ये परिस्थितीनुसार बदल होऊ शकतो. त्यामुळे उमेदवारांनी अपडेट्ससाठी आयोगाच्या संकेतस्थळाला भेट देण्याचे आवाहन करण्यात आले आहे.