पुणे : बोपदेव घाट सामूहिक बलात्कार प्रकरणात पसार असलेल्या तिसऱ्या आरोपीला पकडण्यात पुणे पोलिसांच्या गुन्हे शाखेला यश आले. यापूर्वी गुन्हे शाखेच्या पथकाने रवींद्रकुमार कनोजिया (रा. कोंढवा) आणि अख्तर अली शेख (२८, रा. कोंढवा, मूळ रा. प्रयागराज, उत्तर प्रदेश) या दोघांना अटक केली होती. याप्रकरणातील तिसरा आरोपी हा घटनेपासून फरार होता.
अखेर त्याला वालचंदनगर पोलिसांच्या सहाय्याने पकडण्यात पुणे पोलिसांना यश आले. सूरज उर्फ बापू गोसावी (रा. भवानीनगर संसर, ता. इंदापूर, जि. पुणे) असे या आरोपीचे नाव आहे. ३ ऑक्टोबर २०२४ बोपदेव घाट परिसरात रात्री मित्राबरोबर फिरायला गेलेल्या महाविद्यालयीन तरुणीला कोयत्याचा धाक दाखवून सामूहिक बलात्कार करण्यात आला होता.
या घटनेनंतर पोलिसांनी आरोपींच्या तपासासाठी पोलिसांनी बोपदेव घाटाच्या परिसरातील ४५ गावे, वाड्या, वस्तींवरील ४५० सराईतांची चौकशी केली होती. आरोपींचा माग काढण्यासाठी गुन्हे शाखेकडून ६० पथके तयार करण्यात आली होती. त्यानंतर १० ऑक्टोबर रोजी येवलेवाडी परिसरातून कनोजियाला अटक करण्यात आली होती. चौकशीत आरोपी अख्तर शेख उत्तर प्रदेशातील प्रयागराजजवळ असलेल्या मूळगावी पसार झाल्याची माहिती पोलिसांना मिळाली होती. त्यानंतर गुन्हे शाखेच्या पथकाने शेखला उत्तर प्रदेश येथून ताब्यात घेत अटक केली होती.
