पुणे – गणेश विसर्जन (ganpati) मिरवणुकीदरम्यान डीजे आणि लेझर लाईट्सचा (dj laser light) वापर मोठ्या प्रमाणात करण्यात आला. या लेझर लाईट मुळे पर्वती येथील जनता वसाहत परिसरात राहणाऱ्या एका तरुणाच्या डोळ्याच्या रेटिनाला गंभीर इजा होऊन त्याला काही अंशी अंधत्व आले आहे. अशी माहिती नेत्ररोग तज्ञ डॉ. अनिल दूधभाते यांनी दिली आहे.
मिळालेल्या माहितीनुसार, अनिकेत (वय 23 रा. जनता वसाहत) असे दृष्टीने अधू झालेल्या या तरुणाचे नाव आहे. अनिकेत पर्वती पायथा येथे गणेश विसर्जन मिरवणुकीत सहभागी झाला होता.
नाचत असताना डिजेवरील हिरवा लेजर लाईट त्याच्या एका डोळ्यावर पडला. यावेळी त्याला डोळ्याला काही वेदना किंवा आग झाली नाही परंतु, त्याची दृष्टी मात्र अंधुक झाली. त्याच्या एका डोळ्याची दृष्टी जवळपास 70 टक्क्याने कमी झाल्याचे अनिकेत ने सांगितले.
काय आहे लेझर बर्न?
या हिरव्या लेझर लाईटची फ्रिक्वेन्सी खूप जास्त असते. जे युवक त्या लेझर फ्रिक्वेन्सीच्या ‘फोकल लेंग्थ’ वर आले किंवा त्यांचे नेत्रपटल आले त्यांना असे या त्रासाला सामोरे जावे लागते. आपण लहानपणी भिंग घेऊन ज्या प्रमाणे ऊन्हात कागद पेटवायचो तसाच प्रकार या लेसर ने या तरुणाई वर केला होता.
