प्रभात वृत्तसेवा पुणे :शिवाजीनगर ते स्वारगेटदरम्यानच्या भूमिगत मेट्रो बोगद्यात अचानक पाणी गळती सुरू झाल्याने प्रशासनात खळबळ उडाली. ही गळती बेकायदेशीर बोअरवेल खोदकामामुळे झाल्याचे स्पष्ट झाले असून, घरमालक आणि ठेकेदाराविरोधात निष्काळजीपणा, सार्वजनिक सुरक्षेला धोका निर्माण करणे आणि सरकारी प्रकल्पाचे नुकसान केल्याप्रकरणी खडक पोलिसांत गुन्हा दाखल झाला आहे. पुणे मेट्रोच्या सिव्हिल विभागाचे संयुक्त महाव्यवस्थापक शंतनु गोरात्रा यांनी दिलेल्या तक्रारीनुसार १४ मार्चला दुपारी ट्रेन ऑपरेटर भूषण बारिंगे यांनी कंट्रोल रुमला स्वारगेट ते मंडईदरम्यानच्या डाउन लाइनवर बोगद्यात पाणी झिरपत असून, ते थेट ट्रॅकवर येत असल्याची माहिती दिली. त्यानंतर अधिकाऱ्यांनी तातडीने बोगद्याची पाहणी केली. मात्र, गळती कोठून होत आहे, हे स्पष्ट होत नसल्याने बोगद्याच्या वरच्या भागाची तपासणी केली. त्या वेळी शुक्रवार पेठेतील शिवाजी रोडवर, खडक पोलीस ठाण्यासमोर घर क्रमांक ४१५ येथे वाडा पाडून मोकळ्या जागेत बोअरवेल खोदल्याचे आढळले. चौकशीत ठेकेदार जगताप यांनी घरमालक धनंजय मोटे यांच्या सांगण्यावरून सुमारे ६० फूट खोल बोअरवेल खोदल्याचे सांगितले. यासाठी पुणे मेट्रोकडून परवानगी घेतलेली नव्हती. मेट्रो प्रशासनाने यापूर्वीच या भागात कोणतेही खोदकाम किंवा बोअरवेल घेऊ नयेत, असे स्पष्ट निर्देश दिले होते. या कामामुळे मेट्रोच्या बोगद्याच्या सिमेंट रिंगला सुमारे ६ इंच व्यासाचे छिद्र पडून पाणी थेट ट्रॅकवर झिरपू लागले. यामुळे अंदाजे अडीच लाख रुपयांचे नुकसान झाले आहे. संबंधित बोगदे ६० ते १०० फूट खोल असून, अत्याधुनिक पद्धतीने वॉटरप्रूफ केलेले आहेत, तरीही या निष्काळजीपणामुळे संरचनेला धोका निर्माण झाला. दरम्यान, १७ मार्च रोजी गळती नियंत्रणात आणली असली, तरी धोका पूर्णपणे टळलेला नसल्याचे अधिकाऱ्यांनी सांगितले. कारवाईचा इशारा मेट्रो प्रशासनाने नागरिकांना इशारा दिला आहे, की मेट्रो मार्गाच्या वर कोणतेही खोदकाम किंवा बोअरवेल करण्यापूर्वी संबंधित परवानगी घेणे बंधनकारक आहे. नियमांचे उल्लंघन केल्यास कठोर कारवाई करण्यात येईल. महापालिकेची परवानगी घेऊन जुना वाडा पाडून तेथे नवीन बांधकाम सुरू आहे. त्यासाठी आम्ही आमचा जुना हापसा काढून तेथे फ्लशिंग केले. मेट्रोने गळती झाल्यावर ते बुजविले. मात्र, गुन्हा दाखल केल्याची कोणतीही कल्पना दिली नाही – धनंजय मोटे, घरमालक हेही वाचा : US Israel Iran War : इस्रायल लेबनॉनच्या १० टक्के भूभागावर कब्जा करणार ; इस्रायली संरक्षण मंत्र्यांचा मोठा दावा