पुणे – शहरासह जिल्ह्यात सलग दुसऱ्या दिवशी पावसाची संततधार सुरू आहे. त्यामुळे कमाल तापमानात लक्षणीय घट झाल्याने हवेत गारवा वाढला आहे. शहराच्या काही भागात जोरदार सरी पडल्याने पाणी-पाणी झाले होते. दिवसभरात सायंकाळी साडेपाच वाजेपर्यंत लोणावळा परिसरात सर्वाधिक 70, लवासा येथे 40, तळेगाव परिसरात 10 तर एनडीए आणि पाषाण परिसरात 8 मिमी पावसाची नोंद झाली.
पावसाची संततधार, अधून-मधून येणारी जोरदार सरींमुळे आज पुणेकरांची चांगलीच धांदल उडाली. रस्त्यांवर ठिकाठिकाणी पाणी साचल्यामुळे पादचाऱ्यांचीही कसरत झाली. परिणामी कर्वे रस्ता, डेक्कन, स्वारगेट, शिवाजीरस्ता, शिवाजीनगर, फर्ग्युसन रस्ता यासह अन्य प्रमुख रस्त्यांवर वाहनांची कोंडी झाली होती. कोथरूड परिसरातील एनडीए आणि पाषाण परिसरात जोरदार सरी पडल्या.
तर शिवाजीनगर, कोरेगांव पार्क, कात्रज, धनकवडी, येरवडा या भागात राहूनराहून हलक्या सरी पडल्या. गेल्या 48 तासात हवामानातील बदलामुळे 33 अंशावर पोहचलेले कमाल तापमान आज 28 अंशापर्यंत खाली आले. त्यामुळे रात्री हवेत गारवा जाणवत होता. दरम्यान, पुढील दोन दिवस शहरासह जिल्ह्यात पावसाच्या हलक्या ते मध्यम सरी पडतील, असा अंदाज पुणे वेधशाळेने वर्तविला आहे.
सायंकाळी साडेपाचवाजेपर्यंत शहरासह जिल्ह्यात झालेला पाऊस
लोणावळा – ७०, लवासा – ४०, गिरीवन – २३, निमगिरी – १९, माळीन -१६, तळेगाव – १०, एनडीए आणि पाषाण – ८, शिवाजीनगर – ६, मगरपट्टा, खेड, चिंचवड आणि बारामती – ५, वडगावशेरी आणि हडपसर – ३, हवेली – २.
