ओझर :- विघ्नहर सहकारी साखर कारखाना येथील औद्योगिक प्रशिक्षण केंद्रासमोर शुक्रवार दि ६ डिसेंबर रोजी सायं ६ च्या सुमारास मोटरसायकल व कार यांच्या धडकेत शिरोली बुद्रुक बोचरे मळा येथील एका इसमाचा दुर्दैवी मृत्यू झाला. रामदास निवृत्ती बोचरे वय वर्ष ५२ असे या अपघातात मृत्यू झालेल्या इसमाचे नाव आहे.
शुक्रवारी सायं ६ वा सुमारास रामदास हे आपल्या दुचाकीवरून विघ्नहर सहकारी साखर कारखाना येथे असणाऱ्या पेट्रोल पंपावर डिझेल आणण्यासाठी जात असताना कारखान्यावरून जुन्नरच्या दिशेला भरधाव वेगात जात असणाऱ्या मारुती कंपनीच्या इर्टिगा कारने समोरून दुचाकी वर येणाऱ्या रामदास यांना जोरदार धडक दिली या धडकेत रामदास यांच्या डोक्याला व मांडीला गंभीर दुखापत झाली.
या अपघाताची माहिती मिळताच स्थानिक लोकांनी घटनास्थळी धाव घेऊन जखमी रामदास यांना नारायणगाव येथील रुग्णालयात हलविले मात्र त्यांच्या डोक्याला गंभीर दुखापत झाल्याने त्यांचा मृत्यू झाला. या झालेल्या अपघातानंतर कारच्या चालकाने कार घेऊन पळ काढला असल्याचे स्थानिक नागरिक सांगत असून ही कार जवळपासच्याच गावातली असल्याचे बोलले जात आहे. या घटनमुळे मात्र शिरोली बुद्रुक गावावर शोककळा पसरली आहे. नारायणगाव पोलीस सदर घटनेचा अधिक तपास करीत आहेत.
अपघात झाला त्या वेळेला इर्टिगा कारचा टायर फुटला मात्र त्या अवस्थेतही इर्टिगा कारच्या चालकाने कार घेऊन पळ काढला पुढे जाऊन याच कारने दोघांना उडवले असते मात्र ते सुदैवाने वाचले. रामदास याच्या मृत्यूस कारणीभूत ठरलेली कार ही कुरण या गावातली असल्याचे बोलले जात असून सदर अपघातग्रस्त कार व चालक या दोघांनाही लपवण्यात आले असल्याची चर्चा होत असून पोलिसांनी याचा शोध घ्यावा अशी मागणी शिरोली बुद्रुक गावातील नागरिक करीत आहेत.
