प्रमोद ठोंबरे
बारामती -“दयाची मला दया येते, पण तो काय मला दया दाखवत नाही’, असा शब्दांत मिश्किल टिप्पणी करीत विरोधी पक्षनेते अजित पवार यांनी शाळेतील मित्राच्या आठवणी जागविल्या. बारामती तालुक्यातील गुणवडी येथील विविध विकासकामांची पाहणी तसेच उद्घाटन कार्यक्रम पवार यांच्या हस्ते करण्यात आला. त्यावेळी आयोजित सभेत पवार यांनी शाळेतील वर्गमित्राच्या शालेय जीवनातील मैत्रीपूर्ण आठवणींचा धागा उलगडला.
सभेत पवार यांचे भाषण सुरू असतानाच उदाहरणादाखल त्यांनी काही जणांची नावे घेतली. त्यातच त्यांचे बालपणीचे वर्गमित्र दयाराम सदाशिव महाडिक यांचे नावही त्यांनी घेतले. मैत्रीचा धागा पकडत त्यांनी बालपणीच्या आठवणींना उजाळा दिला. यावेळी पवार यांनी थोड्या हटके पद्धतीने मित्रत्वाची भावना जपत उजाळा दिला.
ते म्हणाले की, दयाची मला दया येते, पण तो काय मला दया दाखवत नाही, अशी आपुलकीची आणि मैत्रीवर मिश्किल भाष्य केले. त्यावेळी भरसभेत उपस्थितांमध्ये दोघांच्या मैत्रीचा धागा उलगडला. त्यानंतर मित्राचा असा उल्लेख केल्यानंतर अजित पवार व दयाराम महाडिक यांच्या मैत्रीची गावकऱ्यांना प्रचिती आली.
कठीण परिस्थितीत मित्राची काळजी
झारगडवाडी येथील दयाराम महाडिक हे पुणे जिल्हा मध्यवर्ती बॅंकेचे निवृत्त विकास अधिकारी आहेत. बारामती येथील महाराष्ट्र एज्युकेशन सोसायटीच्या हायस्कूलमध्ये त्यांचे शिक्षण झाले. महाडिक व अजित पवार त्यावेळी वर्गमित्र होते. मित्रत्वाचे नाते आजही तेवढेच घट्ट आहे. राष्ट्रवादी कॉंग्रेसच्या माध्यमातून अजित पवार राज्याचा व्याप पाहत असले तरीदेखील बारामतीत आल्यानंतर ते त्यांच्या मित्रांना विसरत नाहीत.
कोणत्या ना कोणत्या माध्यमातून ते मित्रांच्या गोतावळ्यात सहभागी देखील होतात. काही आठवणी किस्से सांगतात. 2010 मध्ये महाडिक यांना आरोग्याबाबत समस्या निर्माण झाली. त्यावेळी अजित पवार यांनी स्वतः हॉस्पिटलमध्ये उपस्थित राहून मित्राची घेतलेली काळजी व केलेली मदत आजही महाडिक आवर्जून सांगतात.