पुणे : राष्ट्रपती, पंतप्रधान आणि अतिमहत्त्वाच्या व्यक्तींच्या बंदोबस्तात कामगिरी करणारा पुणे पोलिसांच्या बाॅम्बशोधक-नाशक (बीडीडीएस) पथकातील श्वान “तेजा’ दहा वर्षांच्या सेवेनंतर नुकताच निवृत्त झाला. यावेळी “तेजा’चा निरोप समारंभही करण्यात आला.
शिवाजीनगर येथील “बीडीडीएस’ कार्यालयात हा समारंभ नुकताच पार पडला. “तेजा’चा जन्म दि. ११ जानेवारी २०१५ रोजी झाला. महिनाभरात त्याचा पथकात समावेश करण्यात आला. शिवाजीनगर येथील राज्य गुन्हे अन्वेषण विभागाच्या (सीआयडी) श्वान प्रशिक्षण केंद्रात “तेजा’ला प्रशिक्षण देण्यात आले. सहा महिन्यांचे खडतर प्रशिक्षण पूर्ण करून “लॅब्रोडोर’ प्रजातीचा “तेजा’ सेवेत रुजू झाला, अशी माहिती वरिष्ठ पोलीस निरीक्षक पी. जी. येळे यांनी दिली.
प्रशिक्षण कालावधीपासून पोलीस उपनिरीक्षक सलीम शेख, हॅण्डलर सहायक फौजदार अविनाश श्रीमंत, हवालदार किसन ढेंगळे यांनी “तेजा’चा सांभाळ केला. प्रमुख व्यक्तींच्या बंदोबस्तासह पालखी, गणेशोत्सवातही “तेजा’ने महत्त्वाची भूमिका बजावली. जी-२० परिषद आणि शहरात आयोजित करण्यात येणाऱ्या महत्त्वाच्या कार्यक्रमात त्याने योगदान दिले.
विशेष शाखेचे पोलीस उपायुक्त मिलिंद मोहिते यांच्या मार्गदर्शनाखाली “बीडीडीएस’चे कामकाज चालते. “तेजा’च्या निवृत्तीनंतर पथकाची धुरा “विराट’, “राणा’, “ध्रुवा’, “राॅकी’, “आझाद’, “वीर’, “शौर्य’ या श्वानांवर आहे. “वीर’ आणि “शौर्य’ यांचा पथकात नव्याने समावेश करण्यात आला असून, त्यांना प्रशिक्षण देण्यात येत आहे.
“तेजा’ची कामगिरी
– पुणे शहरातील गणेशोत्सवात सुरक्षा पथकात सहभाग
– पुणे शहरात येणाऱ्या व्हीव्हीआयपी दौऱ्यांवेळी सुरक्षा पथकात सहभाग
– भोसरी येथे दिघी रस्त्यावर रानडुकराच्या शिकारीसाठी वापरले जाणारे गावठी बाॅम्ब फेकून देण्यात आले होते. एका बालिकेने चेंडू समजून एक बाॅम्ब घेतला आणि स्फोटात तिचा मृत्यू झाला. त्या वेळी झुडपांत टाकून दिलेले गावठी बाॅम्ब तेजाने एकट्याने शोधून काढले होते, अशी आठवण बाॅम्बशोधक-नाशक पथकातील हॅण्डलर अविनाश श्रीमंत यांनी सांगितली.
पोटच्या लेकराप्रमाणे सांभाळ…
बाॅम्बशोधक-नाशक पथकातील श्वानांचा मायेने सांभाळ करण्यात येतो. श्वान आजारी पडले, तर त्यांचा सांभाळ करणाऱ्यांना झोप येत नाही. पोटच्या लेकराप्रमाणे श्वानांची काळजी घेतली जाते. दहा वर्षांच्या सेवेनंतर श्वान निवृत्त होते. त्यानंतर त्याला श्वानप्रेमी किंवा संस्थेकडे सोपविले जाते. तत्पूर्वी त्यांच्या पात्रतेचे निकष पूर्ण केले जातात.