इंदापूर पंचायत समितीसमोर धरणे : गटविकास अधिकाऱ्यांना निवेदन
वडापुरी – देशाला स्वातंत्र्य मिळून 75 वर्षे पूर्ण झाल्याने देशभरात स्वातंत्र्याचा अमृत महोत्सव मोठ्या उत्साहात साजरा केला; परंतु वडापुरी ग्रामपंचायतीचे ग्रामसेवक शिवाजी फुगे यांनी ग्रामपंचायत सदस्य, ग्रामस्थ, आणि शाळेतील विद्यार्थी बालकांना कार्यक्रमाचे ठिकाणी पोहचण्यापूर्वीच आणि वेळेपूर्वीच मोजक्‍याच लोकांसह अतिघाईत कार्यक्रम उरकून पलायन केले. त्यामुळे फुगे यांच्यावर देशद्रोहाचा गुन्हा दाखल करावा. शिवाय फुगे यांसह ग्रामपंचायतीच्या कारभाराची खातेनिहाय चौकशी करावी, या मागणीसाठी वडापुरीमधील महिलांनी इंदापूर पंचायत समिती समोर सोमवारपासून (दि. 22) बेमुदत धरणे आंदोलन सुरू केले आहे.
या आंदोलनात अनेक महिला सहभागी सहभागी झाल्या आहेत. आमच्या तक्रार अर्जातील मुद्द्यांची खातेनिहाय चौकशी करून चौकशी अहवाल देण्यात यावा, अशी मागणी आंदोलकांनी केली आहे. वडापुरी ग्रामपंचायतीच्या सदस्या अंबिका शत्रुघ्न बागल आणि श्रीनाथ विकास सोसायटीचे सदस्य गोरख किसन चंदनशिवे यांच्या नेतृत्वाखाली हे आंदोलन छेडण्यात आलयं. दरम्यान चार वाजता गटविकास अधिकारी विजयकुमार परीट यांनी आंदोलकांशी संवाद साधून चौकशी करुन दोषी असल्यास कारवाई करू, असे आश्‍वासन दिल्यानंतर हे आंदोलन स्थगित करण्यात आलं.
ग्रामपंचायत कार्यालयात उपस्थित न राहता ग्रामपंचायतीचे महत्वाचं दफ्तर सोबत घेऊन पंचायत समितीचे आवारात फिरणे, ग्रामसभा तहकूब करणे, मासिक मीटिंग न घेणे. ग्रामपंचायत नमुने 1 ते 33 (अभिलेख) ची नमुना1, 13, 14, 15, 16, 17, 18, 19, 20, 20 क, 20 ख, 20 ख1, 21, 26 ख, 27, 28, 29, 30, 31, आणि 33 ची निपक्षपातीपने खातेनिहाय चौकशी करून चौकशी अहवाल देण्यात यावा. दरम्यान, या आंदोलनास भटक्‍या विमुक्त जमाती संघटनेचे पुणे जिल्हाध्यक्ष तथा प्रदेश सरचिटणीस तानाजी धोत्रे, रिपब्लिकन क्रांतीअरूण सेनेचे संस्थापक अध्यक्ष प्रा. बाळासाहेब लोखंडे यांसह इतर काही संघटनांनी पाठिंबा दर्शवता योग्य त्या कारवाईची मागणी केली आहे.
काय आहेत आरोप…
शासनस्तरावरील विविध वैयक्तिक, सार्वजनिक, हिताच्या योजनांची अंमलबजावणी न करणे, घरपट्टी पाणीपट्टी, भरून सुद्धा हजार, दोन हजार रुपये ची बोळवण केल्याशिवाय ठरावाची प्रत आणि प्रस्तावावर सह्या दिल्या जात नाहीत. महिलांचा अपमान होईल असे उर्मठ बोलणे. या बाबतीत विद्यमान महिला ग्रामपंचायत सदस्या यांची फुगे यांच्या विरोधात इंदापूर पोलीस ठाण्यात तक्रार दाखल आहे.
सरपंचाचे नातेवाईकच कारभार करतात..
वडापुरी ग्रामपंचायतच्या सरपंच या महिला असून त्यांचे दीर कारभार करत असल्याचा आरोपही ग्रामस्थ करत आहेत. यापूर्वीही महिला सरपंचांना कोणताही अधिकार नसून त्यांच्या कुटुंबातील व्यक्तीच गाव कारभार करत असल्याचा आरोप ग्रामस्थांनी केला आहे. अशा अनेक तक्रारी यापूर्वी पंचायत समितीत गट विकास अधिकारी यांच्याकडे करण्यात आल्या आहेत.
संबंधित ग्रामसेवकाची खातेनिहाय चौकशी करण्यासाठी सहायक गटविकास अधिकारी डॉ. राम शिंदे आणि विस्तार अधिकारी मोरे यांची समिती गठीत करण्यात आली आहे. ते आपला अहवाल सादर करतील. त्यानुसार पुढील कारवाई केली जाईल.
– विजयकुमार परीट, गट विकास अधिकारी इंदापूर
