पुणे – दिवाळी सण अवघ्या बारा दिवसांवर येऊन ठेपलेला असताना जिल्ह्यातील 15 हजार अंगणवाडी सेविका, मदतनीस, गटप्रवर्तक दिवाळी बोनसच्या प्रतीक्षेत आहेत. दरवर्षी दिवाळी बोनससाठी आंदोलने करावी लागत असल्याने संतापाचा सूर उमटत आहे. राज्य शासन अंगणवाडी सेविकांना भाऊबीजेच्या रुपात ओवाळणी देणार काय, असा सवाल उमटत आहे.
राज्य शासन अंगणवाडीसेविकांना प्रत्येक कामात राबवून घेते. मात्र, ऐन दिवाळीच्या तोंडावर बोनसचा पत्ताच नाही. अंगणवाडीसेविका, मदतनीस व आशा सेविकांना सरकारच्या भाऊबिजेची प्रतीक्षा करावी लागत आहे. दरवर्षी दोन हजार रुपये भाऊबीज मिळते; परंतु त्यासाठी दरवेळी आंदोलने करण्याची वेळ येत आहे, अशी खंत अंगणवाडी सेविकांनी व्यक्त केली. आमदार, खासदारांना पगार द्यायला सगळेजण एकत्र येतात. आम्हाला काम जास्त आणि मानधन कमी. भाऊबीज दरवर्षी दिवाळीऐवजी शिमग्यालाच मिळते, असा संताप अंगणवाडी सेविकांनी केला आहे.
राज्य सरकारने यंदा दिवाळीत वेळेवर मानधनाएवढी साडेआठ हजार रुपये भाऊबीज द्यावी, “माझे कुटुंब-माझी जबाबदारी’ अभियानातही त्यांचे योगदान मिळत आहे. करोनाच्या काळात अंगणवाडी सेविका, आशा सेविकांना महिला व बालकल्याण विभागाकडून भाऊबीज दिली जाते. यंदाच्या दिवाळीत सरकारने किमान एका महिन्याच्या मानधनाएवढी रक्कम बोनस म्हणून दिली पाहिजे. तसेच आशा सेविकांना अडीच हजार रुपये आणि गटप्रवर्तकांना पाच हजार रुपये द्यावेत, अशी मागणी संघटनेने केली आहे.
यंदा 14 नोव्हेंबरपासून दिवाळीे सुरू होत आहे; परंतु सरकारने भाऊबिजेबाबत चकार शब्द काढला नाही. त्यामुळे राज्यातील अंगणवाडी सेविका आणि मदतनीसांमध्ये नाराजीचा सुर पसरला आहे. सरकारने दिवाळीपूर्वी भाऊबीज द्यावी, अशी मागणी मुख्यमंत्री उद्धव ठाकरे आणि महिला व बालकल्याण मंत्री यशोमती ठाकूर यांच्याकडे संघटनेच्या वतीने करण्यात आली आहे.
आशा सेविका, गटप्रवर्तकांना अद्याप भाऊबीज मिळालेली नाही. आम्ही करोना काळात झोकून देऊन काम केले. त्यामुळे सरकारकडून यंदा दिवाळीपूर्वी भाऊबीज मिळण्याची अपेक्षा आहे.
– स्वाती शिंदे, आशा सेविका, तळेगाव ढमढेरे