मंचर : जीबीएस हा आजार प्रामुख्याने खाद्यपदार्थाद्वारे होत असल्याने मंचर शहरातील हॉटेल, हातगाडीवर खाद्याचे स्टॉल अस्वच्छता असणाऱ्या व्यवसायकावर कारवाई करण्यात यावी. अशी मागणी पाणीपुरवठा समितीचे अध्यक्ष वसंतराव बाणखेले व अॅड. अमर कराळे यांनी केली.
जीबीएस या दुर्मिळ आजाराचा वाढता धोका लक्षात घेऊन जीबीएस (गुइलेन बॅरे सिंड्रोम) या दुर्मिळ आजाराचा प्रादुर्भाव टाळण्यासाठी मंचर नगरपंचायतीने ठोस उपाययोजना तसेच जनजागृती करावी.रुग्ण मोठ्या प्रमाणात आढळून येत आहेत.ज्यामुळे राज्यातील आरोग्य यंत्रणा अलर्ट झाल्या आहेत.
या आजाराचा प्रादुर्भाव पुणे शहरात मोठ्याप्रमाणात झाला असून आत्तापर्यंत एकट्या पुण्यातच अंदाजे १६५ च्या आसपास रुग्ण मृत्युमुखी पडले असून अनेक रुग्ण व्हेंटिलेटरवर असून काही रुग्णांवर उपचार चालू आहे. पुणे जिल्ह्यातील ग्रामीण भागात सुदैवाने आजपर्यंत कोणताच रुग्ण आढळला नसला तरी मंचर शहरातील नागरिकांच्या आरोग्याच्या सुरक्षिततेबाबत उपाय योजना करणे गरजेचे असून जीबीएस या दुर्मिळ आजाराबाबत नागरिकांमध्ये जनजागृती करावी.
त्याचप्रमाणे मंचर नगरपंचायतने जीबीएस आजारच्या उपचाराकरिता स्वतंत्र कक्षाची स्थापना करून मंचर उपजिल्हा रुग्णालयात न्यूरॉलॉजिस्टची नेमणूक करण्यात यावी.तसेच नगरपंचायतीच्या पाणीपुरवठ्याच्या टाक्या व नागरिकांनी साठवलेल्या पाण्याच्या टाक्यांची साफसफाई करणे गरजेचे आहे. अशी मागणी पाणीपुरवठा समितीचे अध्यक्ष वसंतराव बाणखेले व अॅड. अमर कराळे यांनी केली.
मंचर नगरपंचायतीच्या हद्दीत असणारे खाद्यपदार्थ विक्रेते यांनी ग्राहकांना चांगल्या पद्धतीने खाद्य दिले पाहिजे. अन्यथा ग्राहकांच्या तक्रारीनुसार कारवाई केली जाईल.
-गोविंद जाधव, मंचर नगरपंचायत, मुख्य अधिकारी.
