भाजी मार्केटमध्ये फूल मार्केटचा शुभारंभ
बारामती – कृषी उत्पन्न बाजार समितीचे जळोची भाजी मार्केटमध्ये महात्मा ज्योतिबा फुले यांचे पुण्यतिथीनिमित्ताने फुल मार्केटचा शुभारंभ बाजार समितीचे सभापती सुनील पवार यांचे हस्ते करण्यात आला. महात्मा ज्योतिबा फुले पुण्यतिथीचे औचित्य साधून बारामती बाजार समितीने फुल मार्केटचा शुभारंभ केल्याने याचा आनंद होत आहे, असे प्रतिपादन सभापती सुनील पवार यांनी केले. शुभारंभप्रसंगी ते बोलत होते.
फूल उत्पादक शेतक-यांनी याचा लाभ घ्यावा व आपल्या फुलांची विक्री जळोची मार्केटमध्ये करावी, असे उपसभापती निलेश लडकत यांनी सांगितले. जळोची भाजी मार्केट सेल हॉल नं. ५ मधील गाळा नं. ९० चे आडतदार सोमनाथ झगडे व महेश शिंदे यांनी एकत्र येऊन सर्व प्रकारच्या फुलांची विक्री उघड लिलावाने सुरू केली. पहिल्या दिवशी झेंडू, गुलाब, शेवंती, पासली पेंडी आदी फुलांची आवक झाली. शेळगाव, इंदापूर, फलटण, पिंपळी तेथील गणेश कटके, अमित हेगडे, ओंकार शिंदे, अनिल शहा या शेतकऱ्यांनी फुले विक्रीस आणली होती. यावेळी बाजार समितीचे संचालक संतोष आटोळे, फळे व भाजीपाला अध्यक्ष सईद बागवान, आडदार प्रवीण भोईटे, संजय गदादे, मनोज नेवसे, शेतकरी उपस्थित होते. सईद बागवान यांनी आभार मानले.
भविष्यात विविध सुविधा देणार
यावेळी झेंडूला कमाल ३५ रूपये प्रति किलो दर निघाला तर शेवंती ३० ते ४३ प्रति किलो आणि गुलाब शेकडा २०० ते ५०० रूपये, पासली पेंडी शेकडा १००० ते १७०० पर्यंत अशी विक्री झाली. मार्केटमध्ये फुलांची विक्री उघड लिलाव पद्धतीने सुरू केल्याने फुलांचे दर चांगले निघतील. सुट्टीचे दिवस सोडून रोज दुपारी बारा वाजता फुलांचे लिलाव होतील. सर्व फूल उत्पादक शेतक-यांनी आपली फुले लिलावा पूर्वी वेळेत आणि चांगल्या पॅकींग मध्ये आणावीत. भविष्यात फुल मार्केटसाठी विविध सुविधा संचालक मंडळ पुरविणार असल्याचे आश्वासन समितीचे सचिव अरविंद जगताप यांनी दिले.
