राजगुरूनगर : ट्रॅक्टरने जमीन नांगरणी करण्याच्या वादातून चुलत भावाच्या अंगावर ट्रॅक्टर घालुन त्याचा खून करणार्या आरोपीला खेड (राजगुरूनगर) जिल्हा व अतिरिक्त सत्र न्यायालयाचे न्यायाधीश एस. पी. पोळ यांनी जन्मठेपेची शिक्षा सुनावली.
जयनाथ सोपान मनसुख (वय 38, रा. एकनाथवाडी, सावरगाव, ता. जुन्नर) असे जन्मठेप सुनावण्यात आलेल्या आरोपीचे नाव आहे. नोव्हेंबर 2020 मध्ये घडलेल्या या घटनेत प्रकाश नामदेव मनसुख (वय 60) यांचा मृत्यू झाला होता. आरोपी जयनाथकडे ट्रॅक्टर होता. त्या ट्रॅक्टरने तो मयताच्या जमिनीची नांगरणी करीत होता.
किरकोळ कारणातून त्यांच्यात वाद झाल्यावर मयत प्रकाश यांनी गावातील दुसर्या व्यक्तीच्या ट्रॅक्टरने नांगरणी करून घेतली. त्याचा राग अनावर होऊन आरोपीने मयत प्रकाश यांच्या अंगावर ट्रॅक्टर घालुन गंभीर जखमी केले. प्रकाश यांना रुग्णालयात दाखल करण्यात आले होते; मात्र त्याच रात्री त्यांचा मृत्यू झाला होता. राजगुरूनगर न्यायालयात खटला सुरू होता. सहायक सरकारी अभियोक्ता व्ही. एन. देशपांडे यांनी युक्तिवाद केला. या खटल्यात 13 साक्षीदार तपासले. फिर्यादी, प्रत्यक्षदर्शी, तपास अधिकारी यांची साक्ष महत्त्वाची ठरली आरोपीला दोषी धरण्यात आले. या खटल्याचा निकाल सोमवारी (दि. 21) देण्यात आला.
खुनाच्या आरोपाखाली आरोपीला जन्मठेपेची शिक्षा सुनावण्यात आली. यासह पाच हजार रुपये दंड ठोठावला. या गुन्ह्याचा तपास तत्कालीन पोलीस निरिक्षक युवराज मोहिते, डी. ए. देवरे, वाय. एम. पाटील यांनी घटनेचा तपास केला. पोलीस महेश भालेराव यांनी न्यायालयीन पोलीस कामकाज केले.