आमदार मोहिते यांचे अधिकाऱ्यांना आदेश : पाणीपुरवठा योजनांचा घेतला आढावा
आंबेठण – खेड तालुक्‍यातील काही गावांमध्ये पाणी योजना झाल्या आहेत. सर्व योजनांची सखोल चौकशी करण्याचे आमदार दिलीप मोहिते पाटील यांनी सक्‍त आदेश दिले आहेत.
खेड तालुक्‍यातील पाणीपुरवठा योजनांची आमदार मोहिते पाटील यांनी सरकारी रेस्ट हाऊस येथे बैठक बोलवली होती. बैठकीमध्ये राष्ट्रीय पेयजल व जलजीवन मिशन अंतर्गत किती पाणी योजना झाल्या. किती प्रस्तावित आहेत. यासंबंधित आढावा घेतला. ज्या योजना सद्यस्थितीत कार्यान्वित नाही, अशा योजनांची महिती घेतली.
पाईट येथील योजना करण्यास विलंब का होत आहे? बैठका घेऊन सर्व प्रस्ताव परिपूर्ण असून ही योजना उशिरा करण्याचा प्रयत्न केला जात आहे. यापूर्वी ही योजना 4 कोटी 95 लाखांपर्यंत असल्याने जिल्हा परिषदेकडे होती; परंतु त्यामध्ये जॅकवेलचा समावेश नव्हता तर पाण्याच्या टाकीची क्षमता कमी होती, 5 कोटींच्या पुढील योजना महाराष्ट्र जीवन प्राधिकरणकडे जात असल्याने अधिकारी मनीष पवार व धनंजय जगधने यांना 19 जुलै 2022 रोजी फेर सर्व्हे करण्यास सांगितले होते. यामध्ये जॅकवेलचा समावेश करावा व आवश्‍यक बाबींचा विचार करून योजना करावी, त्यानुसार नवीन अंदाजपत्रकाची किंमत 19 कोटी 91 लाख झाली आहे, असे पवार यांनी सांगितले. योजना तत्काळ करण्यासाठी पुढील कार्यवाही करा, अशी सूचना केल्या. आत्तापर्यंत मंजूर योजना माझ्या पाठपुराव्यामुळेच झाले आहेत, असे मोहिते यांनी सांगितले.
पाईट येथील योजनेमध्ये पुढील 30 वर्षांचा विचार करून सर्व्हे केला आहे. त्यामध्ये विहीर व ईतर आवश्‍यक त्या बाबींचा समावेश केल्याने या योजनेचे अंदाजपत्रक साधारणता 20 कोटी पर्यंत गेलेले आहे. या योजनेसाठी आमदार मोहिते पाटील व जिल्हा परिषद, पंचायत समिती व महाराष्ट्र जीवन प्राधिकरणचे सर्व अधिकाऱ्यांचे सहकार्य लाभले.
– जयसिंग दरेकर, अध्यक्ष, राष्ट्रवादी युवक कॉंग्रस, खेड तालुका
पाईट हे गाव मोठे असून पुढील काही वर्षांमध्ये येथे रहदारीचे प्रमाण वाढणार आहे एमआयडीसी सारखे प्रकल्प शेजारील गावांमध्ये होत असल्याने कर्मचारी वर्ग पाईट आणि परिसरात राहण्यासाठी उत्सुक आहेत. म्हणून भविष्याचा विचार करून ही योजना तात्काळ करण्यात यावी.
– मंगल भांगे, सरपंच, पाईट
