शिरूर : शिरूर शहरातील सरदार पेठेत गोळीबाराची घटना घडली आहे. जुन्या रागातून कृष्णा वैभव जोशी या आरोपीने इन्कमटॅक्सला चार वर्षापूर्वी अर्ज केल्याचा गैरसमजातून महेंद्र मोतीलाल बोरा यांना शिवीगाळ करत पिस्तूल काढून जीवे ठार मारण्याचे उद्देशाने महेंद्र यांच्या छातीवर रोखला.
तुला आज जिवंत सोडणार नाही, अशी धमकी देऊन पिस्तूलचा खटका दाबत असताना महेंद्र यांनी त्याचा हात बाजूला ढकलला. तरी कृष्णा याने गोळीबार केला. त्यातून एक गोळी महेंद्र यांना न लागता तेथेच खाली रस्त्यावर पडली. यात महेंद्र बोरा बालंबाल बचावले आहे. यानंतर कृष्णा तेथुन पळून गेला आहे.
याबाबत शिरूर पोलिसांनी दिलेल्या माहितीनुसार 20 जानेवारी रोजी रात्री 9.30 वाजण्याच्या सुमारास शिरूर शहराच्या हद्दीतील सरदार पेठ येथील स्विटी प्रोव्हिजन स्टोअर्ससमोर हलवाई चौक ते मारूती आळी रोडवर कृष्णा वैभव जोशी (रा. सरदार पेठ, शिरूर) याचा महेंद्र मोतीलाल बोरा यांनी इन्कम टॅक्सला सुमारे चार वर्षापूर्वी अर्ज केल्याचा गैरसमज झाल्याने कृष्णा दारू पिऊन महेंद्र बोरा यांच्या दुकानाजवळ येऊन त्यांना शिवीगाळ करून त्याने त्याचे जर्कीगमधील एक पिस्तूल बाहेर काढले आणि गोळी झाडली. या घटनेचा पुढील तपास पोली उपनिरीक्षक चव्हाण हे करीत आहेत. आरोपीला तात्काळ गजाआड केले आहे.
अवैध शस्त्र बाळगणार्यांवर कारवाईची गरज
शिरूर तालुक्यात एकूण 405 परवानाधारक शस्त्र असून शिक्रापूर पोलीस स्टेशन अंतर्गत 121, रांजणगाव गणपती अंतर्गत 50, शिरूर पोलीस स्टेशन अंतर्गत 235 जणांना शस्त्र परवाना देण्यात आलेला आहे. शिरूर तालुका हा भौगोलिकदृष्ट्या मोठा तालुका असून भू-माफिया, वाळूमाफियांत यांच्यात यापूर्वी अनेकदा गोळीबार होऊन गंभीर घटना घडल्या आहेत. शिरूर तालुक्यात मोठ्या प्रमाणात अवैध शस्त्रे नागरिक, तरूण बाळगत असल्याची चर्चा शिरूर तालुक्यात होत असून यापुढच्या काळातही अश्या गंभीर घटनांना सामोरे जावे लागणार आहे.विषेश म्हणजे शिरूर तालुक्यातील एकाही महिलेकडे अधिकृत शस्त्र परवाना नाही. ग्रामीण भागात विनयभंग, छेडछाड, लैंगिक अत्याचार, बलात्कार असे महिलांविषयी गुन्हे मोठ्या संख्येने होत आहेत. त्यामुळे महिला सुरक्षेबाबत चिंता व्यक्त केली जात आहे. आता अवैध शस्त्र तस्करींवर व अवैध शस्त्र बाळगणार्यांवर करडी नजर ठेवणे गरजेचे आहे. अन्यथा शिरूर तालुक्याचा बिहार झाल्याशिवाय राहणार नाही.